Ønskjer kommunen ut av Skakke SA

Sparebankstiftinga Etne vil som kjent gå inn med 30 millionar kroner for å sikre den gjeldstynga og konkurstrua storstova i Etne, Skakke kulturhus, ein økonomisk berekraftig driftsmodell.

Men bankstiftinga har stilt som krav at Etne kommune ikkje lenger skal vere eigar i Skakke. Det går fram av eit notat advokat Sturla Vik-Vestly har laga på oppdrag av bankstiftinga, og som ligg som vedlegg i det som skal vere ei orientering for formannskapet neste onsdag.

— Her er me tydelege. Det er ikkje ein aktuell problemstilling å gjennomføre desse grepa om dei andre eigarane i Skakke SA (og kommunen) framleis ser føre seg at kommunen skal vere betydeleg inne på eigarsida i Skakke SA, heiter det i notatet.