Ny lokalforeining for pensjonistar stifta
Vindafjord har fått sitt eige lokallag i Pensjonistforbundet, og blir eitt av 761 lokallag i landet.
Den 19. juni blei det halde stiftingsmøte for den nye lokalforeininga Pensjonistforbundet Vindafjord. Stiftingsmøtet fann stad på Ølen Kulturhus, Sjøperlo, med 21 engasjerte pensjonistar til stades. Møtet blei leia av fylkesleiar i Pensjonistforbundet Rogaland, Herdis Gunn Rødne.
Pensjonistforbundet har over 255.000 medlemer i Noreg og arbeider for å engasjere fleire eldre i åra framover. Med over 1 million pensjonistar i Noreg, er forbundet ein viktig aktør i arbeidet for å betra levevilkåra til pensjonistane. Med etableringa av Pensjonistforbundet Vindafjord, har forbundet no totalt 761 lokalforeiningar i landet.
Annonse
Det nye styret planlegg å starta arbeidet for fullt etter ferien, og håpar at mange pensjonistar i Vindafjord vil melda seg inn i lokalforeininga. Planen er å laga eit arbeidsprogram utover hausten som vil engasjera mange. Eit av dei viktigaste måla er å arbeida for pensjonistane i Vindafjord sine levevilkår, rettar, samt å skapa eit godt sosialt miljø i lokalforeininga.
