No er skulenedleggingane vedtatt

Nedlegginga av Imsland oppvekstsenter og skuledelen av Bjoa oppvekstsenter var med i kommunedirektør Yngve Folven Bergesen sitt budsjettforslag. Til stor motstand frå mange blei dette også vedtatt i formannskapet sitt budsjett, og seinast torsdag var det ein demonstrasjon utanfor rådhuset i Ølen.

Ingen fleirtal

Vedtaket tysdag vil truleg ikkje skje utan dramatikk. Saman med Ap og KrF har Sp fleirtal i kommunestyret. Partia inngjekk ein samarbeidsavtale om felles budsjett etter valet i 2023 og hadde eit budsjettforslag som blei vedtatt i formannskapet 26. november.

Fleirtalet til dei tre partia er berre 13 mot 12 stemmer, og Grannar har kjennskap til at ikkje alle Sp sine representantar kjem tilstemme for koalisjonen sitt forslag. Dermed har verken dette forslaget, Frp og Høgre sitt budsjett eller forslaget til SV og Vindafjordlista nok stemmer til å bli vedtatt i første stemmerunde.

Forhandla seg fram

Som følgje av det manglande vedtaket i første runde må det eit gruppemøte til for å diskutere moglege kompromiss mellom koalisjonane.

Sjølv om det er skulenedleggingane som har fått mest merksemd, er det truleg ikkje det som det vil bli forhandla mest om. I tillegg til budsjettpartnarane Sp, KrF og Ap, la også Høgre og Frp ned Bjoa skule og Imsland oppvekstsenter i sine alternative budsjett. Vindafjordlista og SV sitt alternative budsjett behaldt skulen på Bjoa og utsette nedlegginga av Imsland oppvekstsenter til hausten 2026.

Basseng blir redda

Blant kompromissa Grannar kjenner til at vil bli gjort er at den sprukne fleirtalskoalisjonen droppar planane om å avvikle bassenget i Ølen i 2026.

KrF, Sp og Ap la opp til å legge ned bassenget i Ølen i sitt opprinnelege forslag til økonomiplan. Den nye symjehallen og bygdahuset i Vats opnar våren 2025, og kommunedirektør Yngve Folven Bergesen foreslo at dette skulle bli det einaste kommunale bassenget i Vindafjord frå året etter. Sp, KrF og Ap støtta dette i sitt forslag, medan Høgre og Frp, så vel som SV og Vindafjordlista, haldt på bassenget i sine forslag.

Sidan minst ein Sp representant vil stemme mot eige parti sitt forslag, vil Sp, KrF og Ap sitt budsjett falle i første stemmerunde, og det må forhandlingar til. Her får Høgre og Frp etter det Grannar kjenner til gjennomslag for ønsket om å halde på bassenget i Ølen.

Då kommunedirektøren foreslo å leggje ned det kommunale bassenget i Ølen, gjekk Ølen IL raskt ut og oppmoda politikarane om å utsette nedlegginga, samtidig som dei lanserte at dei vil byggje eit nytt opplæringsbasseng i tilknyting til den planlagde fotballhallen og garderobeanlegget på det nye idrettsområdet i Ølen. Sidan har dei blant anna starta ein aksjon der dei oppmodar folk om å donere SØK-aksjane sine til idrettslaget, slik at dei kan finansiere utviklinga av idrettsområdet.

Klokka 13.10 blei fellesforslaget frå Sp, KrF, Ap, Høgre og Frp vedtatt med 20 mot fem stemmer. Anne Cecilie Berentsen braut med partigruppa og stemte for Vindafjordlista og SV sitt forslag.

Grannar kjem tilbake med meir om budsjettvedtaket

Les alle sakene om Vindafjord-budsjettet her: Vindafjord-budsjettet