Beredskapskoordinator Anne Beate Økland i Vindafjord kommune planlegg massevaksinering av opp mot 1200 personar på laurdag.
Arkivfoto:Irene Mæland Haraldsen
Nesten tom for influensavaksine
Pågangen etter influensavaksine er ekstra stor i år, og både Folkehelseinstituttet (FHI) og apotekleverandørar er tomme for vaksine. Ved vaksinekontoret i Vindafjord håpar dei å ha nok til målgruppene, men lite til overs for folk elles.
FHI har eit mål om 75 prosent dekning for influensavaksinasjon av personar i målgruppene, som mellom anna utgjer helsepersonell, personar i risikogrupper grunna sjukdom og personar over 65 år. Men i år står mange i fare for å ikkje få vaksinert seg. Tal frå FHI viser at dei 1,2 millionar dosane som er innkjøpt, dekkjer berre to tredeler av behovet i målgruppene. I slutten av oktober hadde FHI 60.000 dosar igjen på lager øyremerka risikogrupper og helsepersonell, og ingen dosar er på veg inn.
Både helsestasjonen i Etne og vaksinekontoret i Vindafjord har bestilt ekstra mange dosar denne sesongen, men så langt ser det ut til at det kan bli lite til overs når helsepersonell og personar i risikogruppene har fått sine dosar. Desse gruppene skal prioriterast og først etter 1. desember kan personar utanom målgruppene få vaksine.
— Me reknar ikkje med å få inn meir nå. Det er ein ekstrem pågang etter influensavaksine og vaksine for lungebetennelse, og helsepersonell og risikogruppene kjem først, seier beredskapskoordinator i smittevern i Vindafjord kommune, Anne Beate Økland.
