— Men eg håpar at vi ikkje når dei same nivåa som i vinter då vi hadde den tredje smittebølgja, føyer han til.
Tysdag var 89 pasientar med covid-19 innlagde på sjukehus, ti fleire enn måndag. Elleve av dei får respiratorbehandling, medan 22 ligg på intensivavdeling. Talet er det høgaste sidan 26. mai.
Pausar gjenopning
Dei høge smittetala den siste tida har fått konsekvensar for gjenopningsplanen.
— Førebels har ein sett gjenopninga på pause for å kunne gjennomføre meir vaksinasjon, og regjeringa vil ta stilling til dette i ein heilskap i tida framover, seier Nakstad.
— Det er ei politisk vurdering kva ein skal gjere med desse gjenopningstrinna, og ikkje minst når dei skal innførast, påpeikar han.
Nakstad peikar samtidig på at gjenopninga i trinn fire i stor grad dreier seg om kontakt mellom menneske som er fullvaksinerte.
– Det er ikkje like avgjerande som handteringa av smitten blant barn og unge er akkurat no.
Risikobilete
Samtidig speler det inn i det totale risikobiletet kor mykje kontakt menneske har med kvarandre i vekene framover, seier han.
– Det er viktig at vi alle no følgjer dei grunnleggjande smittevernråda og held oss heime når vi er sjuke og held avstand til andre i det offentlege rommet. Viss vi i tillegg klarer å avgrense kor mange menneske vi festar med og har tett kontakt med, vil dette saman med vaksinasjonen hjelpe oss til å ta ned smitten, meiner Nakstad.
– Kan det bli aktuelt med innstrammingar, eller er det meir naturleg å gjere som i Danmark der covid-19 ikkje lenger blir rekna som ein samfunnskritisk sjukdom?
– I og med at stort fleirtal av den vaksne befolkninga er vaksinert, vil nasjonale tiltak retta mot desse vere mindre nødvendige og forholdsmessige. Derimot vil lokale tiltak, retta mot aldersgrupper og miljø som har mykje smitte, framleis vere viktig.
(NPK)
