Med lidenskap for planter
Med ein svært romsleg hage og med ei spesiell interesse for alt som veks og gror, har ekteparet Sigrid (60) og Leif Arne (59) Løvereide skapt sitt eige hageparadis med plass til over 100 rhodondendronplanter og andre frodige vekstar.
Rhododendron er ei populær hageplante som finst i mange norske hagar, men få hageeigarar har så rikeleg utval av plantearten som ekteparet Sigrid og Leif Arne Løvereide i Etne. Med 30 ulike typar rhododendron og over 100 rhododendronplanter spreidd over fleire mål, er blomstringstida på våren og forsommaren eit særs vakkert syn for alle som passerer den frodige hagen i Stordalen.
— Me har god plass til å prøva ulike rhododendronplanter, og når me har så stort område må me ha noko som styrer seg sjølv, seier ekteparet Løvereide og viser rundt i den praktfulle hagen med storslagen utsikt over Stordalsvatnet.
Rundt sju mål med hage gjev god plass til eit mangfald av både tre, buskar, roser og klatreplanter, i tillegg til frukttre og bærbuskar, men det største blikkfanget er dei talrike rhododendronplantene som dukkar opp som frodige fargeklattar overalt i hagen.
