Spørsmålet er om det er bøndene sjølve, Vår Herre eller landbrukspolitikken som har mest ære for velstanden i norsk landbruk i 2015.
Norsk institutt for bioøkonomi (NIBIO) si siste driftsgransking viser at jordbruksinntektene auka med 13 prosent frå 2014 til 2015. Høge prisar, auka produksjon og gode avlingar i store delar av landet gav auka inntekt for dei fleste jordbruksproduksjonane. For heile landet var jordbruksinntektene 326.800 kroner per årsverk i fjor, ein auke på 37.500 kroner frå året før.
— Dette er gode tal. God balanse i marknaden og vi har hatt naturen på vår side. Dessutan er det mange flinke bønder. Eg trur ikkje det har noko med at Framstegspartiet er komen inn i regjeringa å gjere, seier Trond Haugland, leiar for samstyret i bondelaga i Vindafjord.
