Kritisk til lokketilbod til studentar

I juni 2018 vedtok eit fleirtal i bystyret i Stavanger å etablera ei kommunal tilskotsordning for studentar som melder flytting til kommunen gjennom å tilby studentane gratis busskort i eitt år. Ordninga skal gjelda alle fulltidsstudentar som har meldt flytting til oljebyen, og for studieåret 2019/2020 må flytting skje mellom 1. mai og 1. oktober 2019. Utanlandske studentar må melda flytting til Noreg og Stavanger for å få gratis bussreiser.

Poenget med gratistilbodet er å få studentar til å melda flytting til kommunen slik at det statlege tilskotet til kommunen aukar. Derfor gjeld ikkje tilbodet for studentar som alt bur i kommunen. Ei slik ordning fell ikkje i god jord hos ordførar Mette Heidi Bergsvåg Ekrheim, som meiner Stavanger kommune og andre studentbyar som har liknande ordningar, bidreg til å redusera tilknytinga mellom studentane og kommunane dei kjem frå.

— Dette er litt tilsniking. Og det er med på å bryta bandet til kommunen. Når ein har meldt flytting mistar ein linken til kommunen. Skal ein melda flytting skal ikkje eit busskort vera motivasjonen. Ei utflytting skal vera ei bevisst handling, seier Ekrheim og trur det kan vera freistande for ein del studentar å nytta seg av tilbodet.