Koste seg på mini-dyrsku

Anna Steinsland er einingsleiar for senteret og ynskjer velkommen denne laurdag ettermiddagen. Det er andre året på rad omsorgssenteret i Vats inviterer alle bebuarar med pårørande til open hage med mini dyrsku, og vêrgudane var på deira side.

— Då begynner det vel å bli ein tradisjon, seier Steinsland samtidig som ho ser at det straks vert fullt og dei treng fleire stolar.

Bondelaget har rigga hagen full at ulike dyr. Dei har med seg sau, geit, kalv, hest og høns. Det tar ikkje lange stunda før eit par høner prøver å finna vegen inn på avdelinga, men dei vert heldigvis stoppa i tide.