Klart for tradisjonell bondemarknad
Laurdag er det duka for Bonde-Marknad i Ølen. Då inntek bønder frå heile Vindafjord Sjoargata for å visa fram kva dei steller med og kva produkt dei har for sal.
— Me arrangerer for at landbruket skal få visa seg fram. Det er bøndene som bak og som får visa ansikt, seier leiar for arrangøren Vindafjordbonden, Eivind Lien frå Ølen og inviterer til ein dag fylt med aktivitetar for store og små, sal av produkt frå lokale bønder, besøk av levande dyr og utstilling av landbruksutstyr.
Tradisjonen tru blir det også i år kappestrid mellom bønder, og for dei minste blir det høve til å ta seg ein liten ridetur, helsa på dyra i hønsegarden, kosa med kaninane, prøva seg på ulike leikar frå gamle dagar eller hoppa i høyet.
Annonse
— Me har ulike aktivitetar for barn som ridning og gamaldagse leikar, og me har sett ut rundballar slik at dei kan hoppa i høyet, seier Lien.
Salsboder
Sal av mat og landbruksprodukt står sentralt under bondemarknaden, og i år kan alle som tek turen til Sjoargata fylla handlekorga med både geitost, honning, eplemost, heimebakst, egg, sjokolade, økologisk is og lokale kjøtprodukt. Og skulle det freista med eit plagg av ekte angoraull, eit skinn frå Granberg Garveri, ein heimelaga kniv eller andre lokale handverksprodukt kan dei ulike salsbodane by på eit rikt utval.
— Me vil ha landbruksprodukt med lokale råvarer og me har utstillarar som er retta mot landbruk. Dei fleste er lokale utstillarar, seier leiaren i Vindafjordbonden.
Annonse
Dyr
Dyr høyrer med når bøndene inviterer til marknad, men i år blir det litt færre dyr å finna i Sjoargata enn ved tidlegare marknadar.
— I år blir det litt færre dyr på grunn av eit virus blant klauvdyr. Og det blir ikkje sauekåring. Men nytt av året er partering av hjort. Kjell Vidar Øglænd vil visa partering og folk kan koma med spørsmål, seier Lien.
I tillegg til salsbodane stiler Tveit vgs, Norsk Landbruksrådgivning, Haugaland avløysarlag og fleire maskinforhandlarar opp med stand.
Populær marknad
Bønder frå alle grendene i Vindafjord kommune er representert under årets marknad. Enkelte stiller opp med sine salsboder, andre hjelper til der det trengst for å få arrangementet vel i hamn.
Annonse
Me har mange bønder med på dugnad, seier Lien som saman med seks andre bønder utgjer arrangørkomiteen.
Vindafjordbonden har stått bak marknaden heilt sidan starten for rundt åtte år sidan, og har hausta menge lovord frå marknadsgjestene opp gjennom åra.
— Me prøver å få ting til å skje og me har fått mange positive tilbakemeldingar frå tidlegare marknader, seier Lien og håpar på godvêr og godt oppmøte også i år.
— Eg håpar me har vêret med oss, seier han.
