Klart for ei veke med telting og friluftsaktivitetar
Ein gong i året blir friluftsliv feira over heile landet ei heil veke til ende. I Vindafjord kan små og store bli med på telttur og i Etne står aktivitetsdag på Osnes og fjelltur på programmet.
Medlemsorganisasjonen Norsk Friluftsliv, som er ein fellesorganisasjon for 18 ulike norske frivillige friluftsorganisasjonar, står bak den årlege friluftsveka der målet er å få flest mogleg ut i naturen. Kvart år i byrjinga av september blir det arrangert friluftsaktivitetar og turmål over heile landet, og i år blir Friluftslivets veke sparka i gang med arrangementet nattinaturen, der heile Noreg blir invitert til å sova ute laurdag 2. september.
Telttur
Annonse
I Vindafjord kommune er det Barnas Turlag som inviterer til ei natt i det fri.
— Det blir teltovernatting til Refsnes, fortel leiar i Barnas turlag Vindafjord, Tina Mari Einem Heggen.
Arrangementet er for barn i alderen 0-12 år og alle som vil kan vera med.
— Det er lagt opp til at barna skal ha følgje med vaksne, og foreldre har ansvar for eigen barn. Me hadde same tur i fjor og det var ein del familiar med. Me håpar mange vil melda seg i år, seier ho.
Annonse
Turen inn til Refsnes går frå Blikrabygda og 2 kilometer innover frå parkeringsplassen ved infotavla om Blikraåna. Turen tek om lag ein times tid og går gjennom eit område med rikt plante og dyreliv. Teltområdet ligg ved eit vatn og innbyr til fisking, bading og leik. Turdeltakarar som manglar utstyr kan få låna dette på Frilager Haugaland.
Aktivitetsdag og fjelltur
I Etne inviterer Etne Frivilligsentral i samarbeid med Etne Turlag, Etne Røde Kors og Etne Jeger og Fiskeforening til aktivitetsdag på Osnes for store og små på laurdag.
— Det er sjette året me arrangerer dette. Her blir det aktivitetar som rebus, hesteskokasting, kanopadling og presisjonskast med fiskestong, seier leiar i Etne Frivilligsentral, Solveig Kvamme og lovar grillmat og bålkaffi til alle som tek turen til Osnes denne ettermiddagen.
Det er ikkje krav om påmelding og folk kan koma og gå som dei ønskjer. Alle som stikk innom får tildelt eit lodd og før dagen er omme blir det trekning av premiar.
— Det er berre å møta opp, seier Kvamme.
Annonse
For turinteresserte som likar å ta turar i fjellheimen kan Etne Turlag sin tur til Håland-Håfjellet-Skånevik på sundag vera midt i blinken. Turen er i overkant av 10 kilometer lang og har rundt 600 stigemeter.
