Snøggbåten på veg inn til kaien på Utbjoa.
ARKIVFOTO: SVEIN-ERIK LARSEN
Inviterer til båtdialog
Skyss har invitert Vindafjord kommune til eit innspelsmøte om båt til kommunen.
Dette kjem fram i eit brev signert direktør Målfrid Vik Sønstabø i Skyss 7. oktober. Skyss er kollektivselskapet til Vestland fylke og har ansvar for mellom anna snøggbåten mellom Bergen og Sunnhordland.
Etter tidlegare politiske vedtak blei stansinga av Ølensambandet – ruta som gjekk via Ølen og Utbjoa – gjennomført 1. juli. To innbyggjarinitiativ gjorde at spørsmålet nyleg blei behandla i fylkestinget både i Rogaland og Vestland. I Rogaland vedtok eit fleirtal å verken ta opp ruta att eller gå i dialog med Vestland om eit spleiselag, medan eit samrøysta fylkesting i Vestland vedtok at saka skal handsamast på nytt i fylkesutvalet 21. oktober.
Som følgje av vedtaket i Vestland førebur Skyss no saka om båttilbodet i Vindafjord.
— I samband med utgreiingane ønskjer vi dialog med kommunen for å diskutere saka, skriv Sønstabø.
