Idrettslag vart svindla
Etne idrettslag betalte 30.000 kroner for det dei trudde var oppgjer for utstyr. Pengane hamna i nevane til svindlarar. No åtvarar politiet mot såkalla direktørsvindel retta mot frivillige organisasjonar.
— Dette var veldig ubehageleg for dei involverte, og utruleg frekt av dei kriminelle, seier leiar Erling Bjarte Rullestad i Etne IL.
Nyleg vart idrettslaget svindla for 30.000 kroner. Metoden dei kriminelle brukte er kjent som såkalla direktørsvindel. Frå før godt kjent som ein metode å svindle til seg pengar frå store verksemder, kor mellomleiarar tilsynelatande får e-post frå overordna med beskjed om å gjere pengeoverføringar. Men der det er kriminelle som står bak.
Den siste tida har den same metoden ramma frivillige organisasjonar i heile landet.
