På nyttårsafta fyller Anna Gravelsæter 100 år. Ho ser tilbake på livet sitt med takksemd.
Foto: Grethe Hopland Ravn
Hugsar godt at brua blei sprengt
Den siste dagen i 2019 fyller Anna Gravelsæter 100 år. Når ho tenkjer tilbake, kan ho minnast både gamaldags gardsdrift, Noreg i krig og tronge økonomiske tider. Likevel har livet vore godt.
Anna Gravelsæter har dei siste fem åra budd på omsorgssenteret i Etne, og frå vindauga sitt i den nye og flotte bygningen ved Etneelva ser ho nesten heilt heim til garden der ho budde saman med ektemannen Jørgen frå bryllaupsdagen i 1944. Framleis er synet godt, og trafikken i Stødlebakken følgjer ho godt med på. Den har definitivt auka med åra. På sjølve nyttårsaftan fyller Anna 100 år.
— Det hadde eg aldri trudd skulle skje meg, seier jubilanten, som gler seg til 100-årsdagen som skal feirast med både slekt og vener på omsorgssenteret. Og om ho får det som ho ønskjer, blir det servert betasuppa denne dagen. Det skal dottera Ingvor stå i bresjen for.
— Eg er glad i betasuppa, og aller best er suppa om ho blir servert med heimelaga pølse i, seier Anna.
