Hjartevarm kunst langs populær tursti

— Me har jobba med dette prosjektet i skuletimane. Det har vore litt jobb, men det har vore veldig kjekt, seier Marta Majer, Dennis Sirnes og Elene Tronstad.

Dei tre 14-åringane har saman med resten av elevane i sjuande til tiande klasse ved valfagslinja redesign ved Skånevik skule, dekorert små steinar, treskilt og lykter med hjarteforma kunst. Dei ferdige kunstverka har dei plassert langs deler av den idylliske Kjærlighetsstien. Treskilta er måla i ein knallraud farge og påført nokre få hjartevarmende ord. Steinane er dekorert i ulike fargar med små hjarte som hovudmotiv.

Kjærlighetsstien i Skånevik er rundt tre kilometer lang og snor seg gjennom vakker natur. Kunstprosjektet har fått plass langs deler av løypa. Ei raudmåla hjarteforma skilt med teksten Me vandrar samen markerer starten av stien mot vest og eit par hundre meter lenger borte står eit nytt skilt som viser kor stien endar.