Næringsliv
Hexacage i sentrum på hektisk Aqua Nor-veke
Målet er å industrialisera produksjonen av fisk i lukka merdar. Om siste dagars intense interesse er ein brukande indikator, er Hexacage-konseptet til Westcon nær ei realisering.
Det er trongt om plassen på den vestlandske fellesstanden innerst i hall A. Det har det vore frå dørene opna tysdag morgon, og til årets store happening innan oppdrett og akvakultur stengte ned torsdag ettermiddag.
– Me har hatt ein eventyrleg pågang. Eg har jobba hjå dei store (AKVA og Scale) i mange år, men maken til dei tre siste dagane har eg aldri tidlegare opplevd på Aqua Nor. Og eg har vel vore her alle gongane sidan 1996, seier Stig Førre.
Første desember i fjor vart han tilsett som dagleg leiar i Westcon Hexacage. For å arbeida heilt og fullt med noko som kan koma til å revolusjonera oppdrettsnæringa, når det kjem til lukka anlegg i sjø. Det var det veldig mange som ville høyra meir om blant dei langt over 20.000 som hadde funne vegen til det enorme messeområdet i og kring Trondheim Spektrum.
