Heidra med pris

For sitt mangeårige arbeid for barn og unge blei ekteparet Anita og Torbjørn Hamre frå Bjoa nyleg tildelt Trusopplærings-prisen i Vindafjord. Sokneråda i Vindafjord har oppretta eit Felles Trusopplæringsutval (FUT) som kvart år løftar fram nokon, enten enkeltpersonar eller fleire i lag, som har gjort ein stor frivillig innsats med å dela trua på Jesus til dei unge. Det engasjerte ekteparet på Bjoa fekk i år prisen først og fremst for sitt arbeid i barne-og ungdomsklubbane Credo og Mini-Credo gjennom 30 år. For ekteparet kom prisen svært uventa.

— Me er mildt sagt sjokkert, seier Torbjørn Hamre om tildelinga.

Barneklubben Mini-Credo og ungdomsklubben Credo er open to gonger i månaden på bedehuset på Bjoa. Her er alle velkomne.

— Barneklubben er open annankvar tysdag. Då har me andakt, mat og ulike aktivitetar. Og me får hjelp av elevar frå Lundeneset, seier Hamre og synes det er veldig kjekt å få bidra til felles aktivitetar for dei yngste i bygda.

— Me trivst veldig godt blant ungane på Bjoa, seier han.

Klubben for dei eldste frå 5. klasse, er open annankvar fredag og byr mellom anna på både aktivitetar og turar. Klubbkveldane er godt besøkt og eit populært tilbod mange set pris på.