Næringsliv
Grunnarbeidet er starta opp
Det er tunge lokale næringskrefter i Vats som står bak storbilverkstaden som om eit halvt års tid skal stå ferdig på det nyvunne næringsområdet som Ottar Skjold Maskin AS har utvikla på Knapphus. Ståle Nesheim og Odd Egil Helgevold gler seg over oppstarten.
Forretningsfamiliane Krakk, Sjurseike og Nesheim går saman om den nye storbilverkstaden.
Styreleiar Ståle Nesheim og dagleg leiar Odd Egil Helgevold i den nye verksemda, hugsar ikkje heilt kven som først kom opp med ideen.
Annonse
— Me må satsa, og me føler oss trygge, seier Ståle Nesheim.
Dei to seier at det ikkje berre eigarane sine eigne bilparkar som skal bli vedlikehaldne her. Ingen av dei mange entreprenørane i bygda er med i driftsselskapet, så det er ikkje anleggmaskineri som vil dominera dei fire verkstadløpa i den frå Saudavegen lett synlege hallen som vil ha ytre mål på 26 x 36 meter.
Rosar kommunen
Både Nesheim og Helgevold rosar kommunen for godt samarbeid i prosessen som leia til byggjestart no i sommar.
Annonse
— Nokon veit at me hadde planar som ville gjort at me allereie ville ha vore ferdige med bygget no i sommar, men det er absolutt ikkje kommunen som er skuld i det. Det er formalitetane rundt etableringa av drifts- og eigedomselskapet som gjorde at revisoren vår sa at me måtte ha alle ting i orden før første spadestikk, seier Ståle Nesheim, som representerer tredje generasjon i familieselskapet.
Det er to verksemder som er etablerte no. Dei er Knapphus Storbilverksted AS som driftsselskap, og Knapphus Storbilverksted Eiendom AS som eigedomsselskap. Dette er ei ganske typisk organisering når ei verksemd eig eigen grunn og bygg.
Dagleg leiar Odd Egil Helgevold er hovudeigar i driftsselskapet med 30 prosent. Sakarias Nesheim Holding AS har 25 prosent. Dei to andre større eigarane er Knapphus Dekk & Bilverksted AS og Krakk Holding AS med høvesvis 20 og 10 prosent. Tre tilsette har kvar 5 prosent, og desse er Kjell Ivar Bru, Mats Håland Sørheim og Håkon Bakkedal frå høvesvis Etne, Etne og Sandeid. I tillegg til styreleiar Ståle Nesheim, sit Endre Krakk, Nils Rune Sjurseike, Odd Egil Helgevold og Mats Håland Sørheim i styret.
I eigedomsselskapet er det Nils Rune Sjurseike som er styreleiar. I styret elles sit familiane representert gjennom Anna Nesheim, Endre Krakk og Jarle Sjurseike. Eigarmessig er det to Sjurseike-selskap som til saman eig 40 prosent, medan Nesheim og Krakk eig høvesvis 25 og 20 prosent. I tillegg er Ottar Skjold Maskin AS inne med 15 prosent, og dessutan er Håvard Skjold styremedlem.
Det er Ottar Skjold Maskin AS som har utarbeida det nye tomteområdet på Knapphus, og det er dei som gjer grunnarbeidet som starta opp 4. august.
— For å få verkstadgraver i lokalet må me sprenga bort grunnfjell, seier Ståle Nesheim.
Klynge
Øvre Vats er med åra blitt ei markant klynge for transport- og anleggsverksemder, spesielt dersom ein tar med Nesheim som ligg over grensa til Nedre Vats.
Annonse
— Det er svært mange køyretøy i selskapa her, og fleire har det blitt nå i seinare tid med Krakk Transport sitt oppkjøp av Hustvedt & Skeie AS sine tankbilar for kraftfôr. Dessuten Bjarne Nordtveit AS som fusjonerer inn Tveit Maskin AS, seier Odd Egil Helgevold frå Sandeid.
Ståle Nesheim fortel at sjølv om deira bilflåte utelukkande består av nyare bilar, er det ikkje slik mange trur at det er lange serviceavtalar på nye trekkvogner.
— Det er typisk eitt års garanti frå leverandør, men elles er det serviceavtalar som regulerer forholda, seier han.
Utan at det heilt blei stadfesta, så er det å tru at med ny stor verkstad vil ein ha ein mekanikarstab som gjer at ein heilt slepp å inngå serviceavtalar.
Trekkvognene har forholdsvis kort levetid før dei blir bytta ut, men hengarar og semitraller er som oftast i teneste lenger.
— Det er ikkje så mykje reparasjonar på hengarar, men dei må jo òg bli vedlikehaldne. For vår del er leverandøren på Møre, så det er dårleg økonomi å køyra utstyret opp der for reparasjon, seier Ståle Nesheim.
