Godt besøk i år også – trass smittepress
Snø og korona gjorde leiar av julemarknadskomiteen Kathrina Håvarstein og resten av arrangøren litt spent på om det ville komme folk til julemarknadaden. Då dagen kom var dei veldige glade for at dei ikkje valte å avlyse.
— Me er veldig glade og letta. Det har vore eit jamt sig med folk heile dagen, fortel Håvarstein.
Då Grannar tek turen rett over lunsjtid på laurdagen står det ein god slant med bilar både på parkeringsplassen og fotballbanen ved Bjoa skule. Mange valde å ta på seg munnbind etter at det blei innført påbod om dette der det er mykje folk samla.
Variert tilbod
I fjor måtte denne og andre julemarknadar i distriktet avlysast grunna pandemien. For å unngå det same i år var arrangementet spreidd til fleire stadar, både inne og ute. Det var juleverkstad og forteljarstund med Kamilla Kleppe Bolstad frå Fitjar oppe med ein gapahuk. Kleppe Bolstad koste seg på Bjoa.
— Det er koseleg å kunne fortelje i så fine omgivnadar med snø og bål, seier forteljaren.
