Godskalk Hamre – den gilde karen er borte

Når Godskalk ikkje er meir, så er ein epoke over.

Sjølve vart eg kjent med Hamre-folket då dei tok til å beita i Trossovdalen tidleg i 1950-åra. Dei var store på sau. Det var Job og Kristoffer, og så Godskalk.

I katalogen for utstillinga i Ølen 3. oktober 1956 stilte Hamrefolket sterkt: Job stiller med risbitane Rival og Borris, og ein heil flokk lamsauer og gimrar. Kristoffer syner og fram ein liknande flokk. Også er Godskalk å finna med to lamsauer. I tillegg stilte han med dei to geitene Ala og Lykle.

Kva premiegrad dyra til Godskalk oppnådde då i 1956, fann eg ikkje ut av, men han var i alle høve godt i gang. Dette var den siste utstillinga for Job. Han døydde den hausten. Godskalk var 11 år. Det var nok nokre vanskelege år på Hamre etter det. Likevel gjekk livet vidare, og snart dreiv Godskalk garden for fullt.

I lange tider var det Rygjasau og Dalasau som var dei store rasane. Hamrefolket synte godt att på saueutstillingane, og elles i sauemiljøet. Dei var store på Rygjasau, og det var alvorlege diskusjonar og tung argumentasjon om kva for av rasane som var best.

I mange år var flokken til Godskalk ein av dei store her i bygdene, og det kravde full innsats. Ein vår var beitet kome, men det var regn og uver dag etter dag, så det var ikkje råd å sleppa sauer og lam ut. Då ringde Godskalk meg: Nå e eg leie. De e fullt å meir enn fullt adle star, men eg kan ikkje sleppa ut». Eg forstod han godt. Det er i slike tider me som driv med sau lurer på kva me held på med. Men det ordna seg etter kvart, og nokre veker seinare kunne han gå til Laberget og sjå sauene kosa seg i godt beite.

Godskalk voks opp i eit stødig og godt sauemiljø. Men han var ikkje ein fastspikra tradisjonsbonde. Han var med i tida, tok til seg dei nyvinningane som kom og var i framkant heile tida.

Det hende at folk ringde meg om hausten og hadde sett ukjende sauer i fjellet med merke slik og slik», og om eg visste kven dei kunne høyra til. Sjeldan kunne eg svara, men då sa eg: Ring til Godskalk, for han veit alt.

Saueepoken på Hamre er over, men det gleder oss at ein ny Job beitar i Trossovdalen.

Godskalk var ei heil tid på sjukeheimen. Eg lova meg sjølv av eg skulle innom han , men dagane gjekk og det vart for seint.

Nå er han borte, men han vil leva i minnet for alle som kjende han.

Einride Aakra