Gjekk mot sine eigne

At fleirtalet i kommunestyregruppa til Sp går inn for å leggje ned skulen på Bjoa og barnehagen og skulen i Imsland har skapt stor splid innan partiet. Styreleiar Solveig Hortman har fortalt at styremedlemmane som ikkje sit i kommunestyret, er mot nedleggingane. Fleire av dei oppmoda i forkant folk til å stille opp på ein demonstrasjon utanfor Vindafjord rådhus torsdag. I demonstrasjonen stod fleire personar bak eit banner som viste at dei stod på partiet si liste for å berge skulane, ikkje leggje dei ned.

Berentsen meiner at det har vore ein open og raus prosess innan partiet, og opplever at dei viser respekt for kvarandre trass usemja. Ho er tydeleg på at dersom Sp, Ap og KrF hadde valt å bevare skulane, hadde ho stemt for det. No kjem ho heller til å stemme for Vindafjordlista og SV sitt forslag i den avsluttande voteringa, og ikkje Sp, Ap, KrF, Høgre og Frp sitt justerte forslag.

— Eg følgjer innlegget deira, fortel Berentsen.

Både Anna Klette Steinsland (Vindafjordlista) og Guri Ravatn (SV) snakka om dei negative konsekvensane for blant anna buattraktiviteten ved nedlegginga. Berentsen seier at den største kostnaden ligg på helse, og at det heller er der ein bør gjere omstrukturering. Ho utdjupa avgjerda si på talarstolen i debatten etterpå.

— Personleg blir det for tøft å stemme for noko eg har sagt eg ikkje vil gjere, sa ho frå talarstolen.

Ho sa at KrF og Ap ba Sp bli einige med seg sjølv om eit budsjett som legg ned skular før dei skulle forhandle med dei. Berentsen trur at skulenedleggingar vil auke takten på den krevjande demografiutviklinga og hemme dei i kampen om folka. Ho sa at spørsmålet om skulenedleggingar er eit verdival.

Avtalen mellom Sp, KrF og Ap i 2023 sikra Ole Johan Vierdal (Sp) ein ny periode som ordførar, Gustav Løge Fosse (KrF) det same som varaordførar og Øyvind Valen (Ap) plass i formannskapet. Der eit nedstemt budsjett på Stortinget etter all sannsynlegheit hadde ført til at statsminister Jonas Gahr Støre og Ap-Sp-regjeringa gjekk av, er rollene i kommunestyret i Vindafjord meir låste for fireårsperioden, med mindre nokon flyttar frå kommunen eller av ulike grunnar får innvilga fritak.

Følgjene av Berentsen si stemme blei difor at det måtte haldast gruppemøte for å finne kompromiss mellom blokkene, slik at eit forslag kan få fleirtal. Der fekk Høgre og Frp inn tre punkt med justeringar i Sp, Ap og KrF sitt forslag.

Symjebassenget i Ølen blir oppretthalde i 2025, 2026 og 2027, og verbalforslaget om nedlegging blir tatt ut. Det blei lagt inn eit nytt verbalforslag om at nyetablerarar skal bli fritekne for eigedomsskatt dei første fem åra, og at kommunedirektøren skal leggje fram ei sak i kommunestyret snarast. I tillegg blir eit ekstratilskot frå stortingsforhandlingane lagt inn i rammetilskotet. 450.000 kroner av dette går til å auke tilskotet til frivillige lag og organisasjonar, medan dei resterande 1,3 millionane blir sette til å auke ramma for oppvekst.