— For farleg, meiner NFF

Det var klubben sjølv som tok kontakt med fotballkretsen etter å ha mottatt bekymringsmelding frå gjestande lag. Problemet er at det kjem opp kvass stein frå underliggande lag som gjer at det er lett å kutta seg opp.

— Dette kan nesten samanliknast med glasskår, seier Jon Asgaut Flesjå, anleggskonsulent i NFF til Grannar.

Undrande

Etter at anleggskonsulenten hadde vore i Skånevik og sett på forholda, kom det straks brev frå Rogaland fotballkrets til eigar, Etne kommune og brukar, Skånevil IL om at anlegget var stengt fram til at forholdet er utbetra.

— Banedekket framstår som direkte farleg, og det vil vera uansvarleg å la barn, ungdom og vaksne utøvarar bruka banen til aktivitet i den stand som den framstår per dato, skriv dagleg leiar Trond Tengesdal i fotballkretsen.

Fotballkretsen stiller seg undrande til rehabiliteringsarbeidet som er gjort på anlegget, og viser til avvik frå retningslinjene Kultur departementet har gitt for bygging, drift og vedlikehald av grusbane.

Tar på alvor

Skånevik IL fortvilar etter stenginga som rammar klubbens fire fotballag. Verst går det ut over A-laget som skulle vore i gang med utetreninga til årets sesong, men også dei andre laga blir utan treningsbane om ikkje anlegget blir opna snart.

Leiar i idrettslaget, Christian E. Nilsen ynskjer på dette tidspunktet å ikkje kommentera saka.

Rådmannen i Etne Elling Hetland seier at dette er ei sak dei tar på alvor og vil prioritera for å få løyst. Det første kommunen vil gjera er å koma i dialog med Skånevik IL og finna ut korleis dei skal handtera saka vidare.

— Me må få avklart relativt rask kva som er bakgrunnen for korleis me har hamna i denne situasjonen og vegen ut av den, seier Hetland.

Rådmannen viser også til ein episode i fjor der det var uvedkomande og køyrde bil på grusbanen. Saka blei meldt til politiet og dei som stod bak, rydda opp etter seg. Om dette har noko med den oppståtte situasjonen å gjera, kan han ikkje seia.

Ikkje etter boka

Det er rapporten til Jon Asgaut Flesjå som er bakgrunnen for fotballkretsen si avgjerd om å stenga anlegget i Skånevik. Norges Fotballforbund sin anleggskonsulent for Vestlandet/Sørlandet er klar på at banen ikkje er bygd etter boka.

— I grushandboka er det definert korleis ein bane skal byggast opp, til dømes størrelsen på stein. Her er det rett og slett brukt feil fyllmasse, seier Flesjå.

Han avviser at anna bruk, som bluesfestivalen, har noko med problemet å gjera. Flesjå trur ikkje det er nødvendig å skifta ut massen, som er henta frå eit steinbrot med såkalla hedleblåstein.

— Det bør rett og slett leggast meir toppdekke på banen slik at den kvasse steinen ikkje kjem opp når ein sloddar banen.

Bekymringsfullt

Anleggskonsulenten seier alle partar er tente med at banen er stengt i påvente av å bli ordna.

— Både klubb og kommune vil tena på dette ettersom dei har ansvar over for spelarar dersom det oppstår kuttskade.

Etter sitt besøk i Skånevik har Flesjå også merknad til hovudanlegget. Han registrerte at det var betydelege søkk i banen og at eit større parti av grasmatta var defekt.

— NFF og Rogaland fotballkrets synest det er trist og bekymringsfullt at den nyreneoverte grasbanen på dette flotte idrettsanlegget framstår slik etter berre eit års bruk.