Kongebesøket
Fekk klar ny båthamn til kongebesøket
Kongeparet kjem inn til Ølen med Kongeskipet Norge torsdag. Ølen Båtlag ønskjer at mange reiser ut i båt og helse kong Harald og dronning Sonja velkommen. Dei håpar kongeparet likar synet av deira nye dugnadsbygde båthamn.
Kongebesøket
30. mai kjem kongeparet til Vindafjord
Du kan følgje besøket live på grannar.no
Tips oss om saker me bør skrive om i samband med den store dagen, og del dine bilde med lesarane:tips@grannar.no eller MMS 975 70 789
Foto: Jørgen Gomnæs / Det kongelige hoff
Les alt om kongebesøket her:
— Me har oppmoda medlemmene til å ta båtane på sjøen og møte kongen, fortel hamnesjef Magnar Nøkland i Ølen Båtlag.
Faktumet at besøket skjer i arbeidstida gjer at ikkje alle som vil får høve til å vere der. Sjølv er Nøkland opptatt med jobb i Stavanger. Båtlaget vil likevel vere godt representerte torsdag. Magnar Heggebø, Svein Brekke, Kjartan Grøndal, Bjørn Inge Heggebø, Sverre Andersen og Lars Toadalen gler seg til å ta imot kongeparet. Dei satsar på å komme seg ut i båtane sine for å møte kongeskipet.
Annonse
— Eg trur det er ein god del som tenker å gjere det, seier Toadalen.
Mange dugnadskveldar
Ei organisert mottaking av kongeparet har ikkje blitt planlagt av båtlaget, men det har blitt diskutert kva dei skal gjere under nokre dugnadsøkter. I løpet av onsdagen sende Nøkland ut ei oppmodinga om å møtte kongeparet i båt i eit Facebook-innlegg. Der skriv han at det er lurt å vere ute ved Romsa i god tid.
Den siste tida har hovudfokuset til Ølen Båtlag vore å bygge ei ny båthamn på dugnad. Båtlaget hadde innflytting på hamna sist veke og dei første båtane kom denne veka. Tidspunktet for fullføringa av hamna, som ligg ti meter frå der kongeskipet skal gå i land, kunne neppe passa betre for Nøkland og båtlaget.
Annonse
— Eg håpar kongen kjem og ser den fine hamna me har laga til, seier hamnesjefen.
Arbeidet med den nye hamna har gått føre seg over fleire år. Kjartan Grøndal fortel at det har blitt ein del dugnadskveldar i det siste for å ha hamna klar til kongeparet sitt besøk. I tillegg til dette prosjektet har dei også fått på plass eit nytt opp båtopptrekk ved den gamle hamna.
Med den nye hamna er det nå 85 båtplassar, samt at båtlaget har 20 plassar til borte ved kyrkja. Grøndal opplyser at båtlaget har fått 15 nye medlemmer den siste månaden. Sjølv om den nye båthamna har blitt innvia og fått båtar er det framleis litt arbeid igjen. Dugnadsgjengen venter på at siste rest av moloen skal sette seg, slik dei kan få fullført prosjektet i løpet av året.
Kan følge skipet
Ølen er siste etappe på ei rundreise for kongeparet. Vindafjord kommune skriv på si nettside at etter det dei har fått opplyst vil KS Norge komme til Ølensfjorden forholdsvis kort tid før arrangementet startar onsdag klokka 11.
Det vil vere mogeleg å ta imot kongeskipet via sjøvegen for dei som ønskjer det. Kommunen understrekar at det er viktig at dei som møter kongeskipet i båtar viser omsyn og held nødvendig avstand. For dei som ønskjer å følgje med på kvar fartøyet er, så vil det vere mogeleg å følgje fartøyet digitalt, mellom anna på www.marinetraffic.com.
Annonse
På veg inn til Ølen vil kongeskipet passere blant anna Bjoa. Hamnesjef Dag Monsen i Bjoa Båtlag fortel at dei så vidt har snakka om det, men at det ikkje var nok respons til at dei vil gjere noko spesielt når kongeparet seglar forbi. Han synest det er fint å få kongeskipet inn fjorden og trur at også resten av båtlaget synest det er stas. Han har ikkje planar om å vere ute i båt sjølv.
Kongesøket fører også med seg nokre sikkerheitstiltak. Blant anna har politiet innført forbod mot bruk av dronar i Ølen i samband med besøket. Vindafjord kommune skriv at det er særs viktig at dette forbodet blir respektert. I tillegg ber dei om at det ikkje nyttast paraplyar av publikum under arrangementet. Dette for å sikre at alle får god utsikt, både til Paviljongen der kongeparet sit, til scena og til storskjermane.
Kommunen oppmodar alle innbyggjarar i Vindafjord om å heise flagget når kong Harald og dronning Sonja kjem på besøk. Når arrangementet ved Sjøperlo er ferdig, spanderer kommunen bollar på dei besøkande, så langt lageret rekk.
Har du tips til saker me bør skrive om i samband med kongebesøket? tips@grannar.no – tipstelefon 975 70 789
Dersom kong Harald snur hovudet mot venstre når han går i land ser han bort på den nye båthamna. FOTO: SVEIN-ERIK LARSEN
