Er gira på ny periode

I komfortable treningsklede og høge sjøstøvlar tar Lisa Marie Ness Klungland i mot lokalavisa som kjem på besøk. Den vanlegvis så styla stortingspolitikaren har denne dagen knytt håret opp i ein laus hestehale, og vinden har rufsa til hårsveisen ein smule. Hendene ber preg av hagearbeid – og ho nyt det.

— Det er så herleg her! Me kjøpte huset 1. april og flytte inn 1. mai. Og her er det godt å bu, seier ho om den nye eigedommen i Sjoargata i Ølen. Ei aldri så lita perle, kloss i sjøkanten, der ho bur i lag med sambuar Steffen.

Akkurat no har Stortinget sommarferie og Ness Klungland har dagar der ho kan kopla av ein smule. Føremiddagen har ho og ei venninne brukt til på ridetur, på lånte hestar. Det er godt å kunna trekka pusten litt, også for å lada opp til ein ny travel haust på Stortinget.