Eit praktbygg for kultur og læring
Det nye Kultur- og læringssenteret i Ølen kan endeleg opna dørene for publikum og visa fram perla ved sjøen som husar både bibliotek, kulturskule, vaksenopplæring, frivilligsentral og kulturadministrasjon.
Store fasadar, romslege planløysingar og vedlikehaldsvenleg materialval pregar Vindafjord kommune si nye storsatsing midt i Ølen sentrum. Med Ølen kulturhus og ein flunkande ny aktivitetspark som nærmaste nabo, ruvar den treetasjes arkitektoniske perla godt i terrenget nede ved sjøkanten og tilbyr kommunen sine innbyggjarar ei rekkje ulike tenester under same tak.
Biblioteket legg beslag på det største arealet av den 1.950 kvadratmeter store Sjøperlo med sine rundt 550 kvadrat, og med store og romslege romløysingar fordelt på tre etasjar, gjev det nye lokalet rom for både bøker, lesekrokar og studieplassar. I andre etasje er det sett av ei eiga avdeling for ungdom og på toppen i tredje kan den kreative gleda få fritt utløp.
— Her skal me ha skaparverkstad med mellom anna symaskinar og 3D-printer, fortel biblioteksjef Any Tordis Heggebø og håpar loftstova vil bli flittig brukt når alt er på plass.
