Tettare på
Eit godt hundeliv
Etter eit år som kennelhjelp valde Anna Rødne Gjerde (21) frå Etne å ta steget til å køyre løp sjølv. Ho nyt eit hunderikt liv i ei hytte på Dagali i Hol kommune.
Hytta Anne Rødne Gjerde bur i har ikkje innlagt vatn og straum, så ho må pumpe for å sikre seg nødvendig vatn. Ho lagar mat på ein gassomn. I tillegg har hytta ein gammal peisomn som ho fyrer i for å halde seg varm.
— Nå er me inni ein mildvêrsperiode, så temperaturen ligg på mellom minus 10 og 0 grader. På det kaldaste i vinter var det nede i 40 minusgrader, fortel Rødne Gjerde.
Annonse
Toalettbesøk blir på ein utedo. Etnebuen synest det er veldig lærerikt og anbefaler alle å bu slik ein gong. Ho omtalar tilværet som ein veldig annleis livsstil og kvardag, og trivst veldig med det.
— Du lærer å sette pris på små ting og tar livet litt meir med ro, seier Rødne Gjerde.
Som eksempel på ein lærdom trekker ho fram bevisstheita på matsvinn, og illustrerer med at ein ikkje kastar mat like lett då ein ikkje har tid til å reise på butikken kvar dag. Om brødet er tørt et ho det ein dag til, grønsaker kastar ho så og sei aldri, og ho et pålegget opp til det er tomt.
Det ligg to andre hytter i nærområde. Med få naboar får etnebuen god øving på å trivast i sitt eige selskap. Ho fortel at det er dagar som er tunge, men at dei gode veg opp for det. Kvardagen lærer ho å bli meir sjølvstendig og lage ein plan for dagane.
Annonse
22 hundar
Rødne Gjerde kom til Dagali i 2022 som kennelhjep for Ralph Johanessen. Johannessen har deltatt i Finnmarksløpet fleire gonger og vann det i 2010. Han har òg to andreplassar i det profilerte trekkhundløpet. I 2012 gjekk han til topps i Gausdal Maraton og Pasvik Trail. Året etter var han sigerherre i Femundløpet F600.
Før førre hundekøyresesong var over bestemte Rødne Gjerde seg for å bli eitt år til og det blei bestemt at ho skulle få køyre løp denne sesongen. Ho er blitt ein del av Team Dagali, som er laget til Johanessen.
— Nå har me 19 hundar i trening. Me har og fått tre kvalpar som snart skal starta med opplæring, fortel etnebuen.
Nå i løpssesongen er det mykje trening. Rødne Gjerde opplyser at dei pleier å trene seks dagar i veka i all slags vêr, slik at hundane skal takle det meste. Dei pleier å ligge på mellom 80 og 100 mil med trening i månaden.
Vegen til Dagali starta på Folkehøgskule i Alta. Der fortalte ein av lærarane at Johanessen trong kennelhjelp. Rødne Gjerde tenkte at det virka spennande og greip sjansen. Etnebuen merkar forskjell frå første året som kennelhjelp, kontra denne sesongen kor ho trenar hundane for å konkurrere som hundekøyrar.
Annonse
— Eg føler at når ein skal køyre dei sjølv så er ein meir merksam på korleis kvar hund går og korleis den har det i ulike situasjonar som vêr, vind og ulike løypeforhold, seier Rødne Gjerde.
Ved å kjenne kvar enkelt hund blir ho i stand til å vite korleis ho kan hjelpe og gjere mest mogleg for dei i bestemte situasjonar.
Ville utvikle seg
Ein av grunnane til at etnebuen bestemte seg for å ta eit år ekstra på Dagali var at ho var veldig usikker på kva ho ville studere og gjere vidare. I lys av det synest ho det var fint å ta eit år til med hundekøyring og få litt meir tid på finne ut av det. Ho ville også utvikle seg enda meir som hundekøyrar og lære meir av Johansen, som ho omtalar som av ein av dei beste i landet.
— Eg hadde veldig lyst til å køyre løp då det er det neste steget, samt å oppleve ein ny måte å utforske sporten på og læra meir om hundane i løpssetting og korleis ein skal takle det, fortel Rødne Gjerde.
Johansen jobbar tre dagar i veka nede i Kongsberg. Då er det etnebuen som styrer kennelen. Ho fortel at det er viktig og ha ein plan og klare å gjennomføre oppgåvene som må bli gjort i løpet av dagen.
Dagane Team Dagali ikkje er på trening blir det mykje stell av hundane. Dei masserer hundane som har behov for det, sjekkar potane deira og smørjer hundane med krem for å unngå sår og sprekker, tøya og bøya for å sjå at det ingen som er blitt stive eller fått skade. Hundane får vere lause i hundegarden, slik at dei få springe og leike med kvarandre.
God debut
12. januar gjekk Gausdal Maraton av stabelen. Rødne Gjerde stilte i klassa som køyrde 200 kilometer i det som var hennar første løp som hundekøyrar. Løpet starta og slutta på Astridbekken skisenter i Gausdal Vestfjell. Når ho har fått løpet litt på avstand omtalar ho opplevinga som både spennande og skummel.
— Eg sit igjen med ein kjempestor meistringsfølelse, seier etnebuen.
Å køyre 20 mil kravde ein del meir enn kva Rødne Gjerde eigentleg hadde tenkt, men ho synest det absolutt var verd det. Debuten hennar enda med delt fjerdeplass blant dei 13 som stilte til start i klassa. Etnebuen er stolt over resultatet og seier at det ikkje kunne gått betre.
Rødne Gjerde køyrde ut frå start klokka 13.41. Då var det lyst og fint vêr. Etter nokre timar blei det mørkt og etnebuen og hundane skulle opp på eit fjell, 1.300 meter over havet. Der var det ein del lange oppoverbakkar og mykje vind.
— Det blei litt krevjande og eg kjente at eg måtte jobbe litt med meg sjølv for å halde humøret oppe, fortel Rødne Gjerde.
Cirka klokka 20.50 nådde ho eit sjekkpunkt der det var fem timars obligatorisk kvile. Ho minnast at det ikkje blei så mykje søvn, sidan ein først må fôre og stelle hundane. Når ho kom seg til ein lagbil handla det om å prøve å få i seg litt mat, men ho var så nervøs at ho verken hadde stor matlyst eller var trøtt.
Då pausen var over køyrde ho ut på same løype. Rødne Gjerde synest det var ganske greitt, for då ho hadde vore gjennom løypa ein gong visste ho meir kva ho hadde i vente. Rundt 5-6-tida kjente ho trøttheta komme sigande, men ho hadde litt sjokolade og energidrikk som gjorde at ho kvikna til igjen. Etter cirka åtte og ein halv time på farten kom ho i mål med alle hundane ho starta med.
— Alt i alt er eg superfornøgd med eigen innsats, og kjempestolt over hundane som gjorde ein fantastisk jobb, seier ho.
I februar var ho med som handler for Lisbet Ottesen, som køyrde F450 klassa av Femundløpet. Ein handler hjelper til med alt unntatt hundane undervegs i løpet, eksempelvis matlaging, strategi for løpet, klestørk og oppdateringar undervegs.
Klar for å studere
Rødne Gjerde er godt vant med dyr frå oppveksten på gard i Etne. Dei siste åra har familien budd i leilegheit i sentrum. Nå i løpssesongen er ho ikkje så ofte i heimbygda, då det er mykje trening og pakking til forskjellege løp og diverse ting som må gjerast. På hausten og våren blir det litt oftare.
I heimkommunen har Rødne Gjerde engasjert seg politisk i Etne Frp, kor ho er varamedlem i styret. Ho er også nestleiar i kontrollutvalet i kommunen og vararepresentant i kommunestyret.
— Akkurat nå er det litt vanskeleg å kombinere politikken med livet på Dagali, noko eg synest er veldig dumt, fortel Rødne Gjerde.
Ho prøver så godt ho kan å vere med på møter gjennom Teams, men det er ikkje alltid det klaffar med treningsrutinen hennar. Etter sesongen lovar ho å komme sterkare tilbake, noko ho gler seg til. Planen til Rødne Gjerde er å bli på Dagali ut denne hundekøyresesongen og så begynne å studere.
— Så får me heller sjå om eg kjem tilbake til Dagali, seier Rødne Gjerde.
Ho håpar å få studere på Universitet i Stavanger.
