Éin av fem studentar som leiger privat, har fått husleiga auka ulovleg

– Utleigar kan berre auke husleiga éin gong i året, og då ikkje meir enn konsumprisindeksen, forklarer forbrukarjurist Nora Wennberg Gløersen i Forbrukarrådet. Ho påpeikar at kunnskapen ofte er låg både hos utleigar og leigetakar, noko som fører til at mange betaler meir enn dei skal.

Undersøkinga avdekkjer også fleire andre utfordringar studentar møter på leigemarknaden. Éin av fem rapporterer at standarden på bustaden var vesentleg dårlegare enn lova, medan éin av ti har opplevd at utleigar har låst seg inn utan løyve.

Forbrukarrådet tilrår studentar å ta kontakt med utleigar ved urettmessige husleigeaukar eller andre problem. Om ein ikkje blir samde, bør saka takast vidare til Husleieutvalget.