Donerer gamal mannskapsbil til Ukraina
Etne kommune vurderer å gi den gamle mannskapsbilen sin til den humanitære organisasjonen NUBAS. Tysdag 2. desember skal formannskapet avgjera om køyretøyet skal sendast til Ukraina, der behovet for brann- og redningsmateriell framleis er stort.
Publisert
Sist oppdatert
Etne kommune kan bli den neste norske kommunen som sender naudsynt redningsmateriell til Ukraina. Formannskapet skal tysdag ta stilling til om ein Mercedes mannskapsbil frå 1994 skal donerast til organisasjonen NUBAS – Norsk Ukrainsk Brann- og Ambulansestøtte. Kommunedirektør Åsmund Andersen Sekse tilrår at bilen blir gitt vekk slik saka ligg føre.
Gamle-bilen har gjort jobben
Annonse
Etne brann og redning disponerer ein Mercedes 1224 frå 1994. Denne bilen blir overflødig fordi Skånevik stasjon har fått ny brannbil i 2025, og Etne overtar dermed Skånevik sin tidlegare mannskapsbil frå 2009. Utstyret blir flytta frå den gamle bilen til den nyaste, som dermed er klar for vidare operativ teneste lokalt. Den gamle bilen er fullt operativ, men teknologisk moden, og kostnadene for å behalda han utan fast funksjon ville ha omfatta EU-kontroll, service, forsikring og lagring.
Mercedes-bilen frå 1994 har ei totalvekt på 12 tonn, firehjulsdrift, ein motor på 240 hestekrefter, fem seter og Siegler-pumpa.
Humanitær organisasjon
NUBAS er ein frivillig, non-profit organisasjon registrert i Brønnøysund- og Frivilligheitsregisteret, etablert i 2022 av dagleg leiar Odd Steinar Rønne. Organisasjonen leverer donerte brann- og redningskøyretøy direkte til brannvesen i Ukraina, gjennom eit system der mottak skjer i Rava Ruska i Lviv-regionen. Derifrå blir køyretøya sett inn i beredskap aust i Ukraina.
Annonse
NUBAS har til nå levert 257 utrykkingskøyretøy og 66 trailerlass med helse- og redningsutstyr frå heile landet. Organisasjonen har ti køyretøy klare for levering i januar og februar 2026, fire av dei ambulansar. NUBAS dekker alle kostnader ved transporten, inkludert forsikring, ferje, spedisjon, diesel og retur av sjåførar. Donatorar får tilbod om sjåførplass.
Ikkje svekking av beredskap
Ifølgje saksframlegget vil gåva ikkje svekka beredskapen i Etne kommune. Overføringa av mannskapsbilen frå 2009 gir eit løft i kvalitet og driftssikkerheit, og kommunen har ikkje plass til 1994-bilen ved Etne-stasjonen. Dersom den gamle bilen skulle bli ståande, måtte han ha vore plassert ved Engeleiren utan tilgang til operativ teneste.
Må inngåast avtale
Kommunedirektøren føreslår at donasjonen skjer under føresetnad av at det blir skrive ein avtale med NUBAS som regulerer transport og ansvar. Alt utstyr skal vera flytta over i den nyare bilen før overlevering, og kommunen presiserer at donasjonen ikkje skal få konsekvensar for beredskapen lokalt.
