Knivstikkinga i Ølen
Den knivstukne er utskriven frå sjukehus
Mannen som blei knivstukken i Ølen laurdag kveld er utskriven frå Haukeland universitetssjukehus.
Det kjem fram i ei pressemelding frå politiet sundag ettermidag.
— Vi er i gang med avhøyr av den sikta. Eg ønskjer ikkje å kommentere kva som har kome fram i avhøyret, seier politiadvokat Fredrik Martin Soma.
Annonse
Det blir vurdert fortløpande om den sikta mannen skal framstillast for varetektsfengsling.
— Fornærma er no utskriven frå Haukeland universitetssjukehus. Fornærma er førebels ikkje avhøyrt. Vi håpar å avhøyre han i kveld, seier Soma.
Politiet har i dag òg halde fram med avhøyr av vitne.
Ukrainske statsborgarar
Annonse
— Sikta og fornærma er ukrainske statsborgarar og budde på same adresse i Ølen. Vi jobbar no for å skaffe oss ein oversikt over kva som har skjedd både under valdshendinga og i forkant av hendinga. Det er for tidleg å seie noko om motiv, seier Soma.
Odd Arild Helland er oppnemnd som forsvarar for mannen i 60-åra som er sikta for drapsforsøk.
Helland har prata med klienten sin, melder Haugesunds Avis.
— Samarbeidar med politiet
— Vi har snakka saman, men ikkje så mykje. Det eg kan seie, er at han samarbeider med politiet og vil gjere sitt for å opplyse saka. Han uttrykkjer at han er lei seg for det som skjedde, og glad for at fornærma er i live, gjenfortel forsvararen til avisa.
Elisabeth Rød er oppnemnd som bistandsadvokat for den fornærma mannen i 50-åra.
Les alle sakene om valdshendinga her: Knivstikkinga i Ølen
