Ludvig Rygg Sørheim (8) fanga den første fisken på sundag. Han omtala denne auren som ein av dei minste fiskane han nokongong har fått.
Foto: Kristina Haugen Moe
— Dårleg vêr er ikkje alltid ein brems
Regnet stoppa ikkje dei rundt 25 deltakarane på Etne jakt- og fiskeforbund sin fiskedag. Ludvig Rygg Sørheim (8) kunne nemleg fortelje at det er større sjanse for å få fisk når det er regn og dårleg vêr.
— Det nappa! Eg har fått fisk!
Ludvig Rygg Sørheim (8) står på ein liten holme for seg sjølv og fiskar langs Hjørnåsvatnet. Fiskedagen arrangert av Etne jakt- og fiskeforbund har nettopp starta, det er søndag, og det er ikkje mange som har fått sluken i vatnet. Sørheim var ein av dei første. Dermed klarte han også å bli den første til å få fisk på kroken.
— Den er ganske liten då, sikkert ein av dei minste fiskane eg har fått. Eg har fått mykje større fisk før, seier Sørheim og held opp den litle auren.
