Badstu med fjordutsikt

Trygt plassert på ei solid flytebrygge og med flott utsikt over fjord og fjell ligg Heit Ølen Sauna. Den nye saunaen er open året rundt, og alle som ønskjer seg ei gloheit oppleving i kvardagen, kan bestilla seg ein time aleine eller saman med andre. Frisk Treningssenter står som eigar av det nye tilbodet, og tilsette ved treningssenteret syt for at det er både varmt og reint til gjestene.

— Dei som bestiller time, kjem til reingjort og oppvarma badstu. Saunaen har ope frå ni på føremiddagen til ti om kvelden, og me tek imot alle personleg, seier dagleg leiar i Frisk Treningssenter, Andreas Hustveit, som driv saunatilbodet i Ølen gjennom franchisegjevar Heit Sauna Norge.

— Folk kan bestilla time på nett. Enten privattid eller som felles badstu. Saunaen har plass til 10 personar, og prisen varierer etter talet på personar. Frisk sine medlemmer får rabatt på felles badstu, seier han.