Me set vår lit til at dei folkevalde ser verdien av urørt natur

Dette er eit lesarinnlegg. Innhaldet gir uttrykk for skribenten sine eigne meiningar og haldningar.

Naturvernforbundet Vindafjord/ Etne og Motvind Vindafjord synte 08.04 filmen «Vi som solgte landet», ein film som løftar fram korleis naturressursane våre blir forvalta – og kva konsekvensar vala våre får for både natur og lokalsamfunn. Me vil takka alle som kom. Det blei ein interessant kveld der me fekk høyra regissøren Kieran Kolle fortelja om bakgrunnen for filmen og oppleva ein film som var nydeleg i form av naturbilete, men og provoserande i forhold til bilete av store naturinngrep og sviktande tillit til demokratiet. Fleire kjende seg nok òg igjen i eigen kommune der fleire saker no kjem opp allereie 14.april i kommunestyret i Vindafjord. Innbyggarar set no si lit til at blant anna underskriftskampanjar kan bidra til demokratiske val i kommunestyret, at dei folkevalde vil høyra og sjå.

Sjølv om me hadde håpa at fleire av dei frammøtte skulle vera folkevalde frå kommunane, at dei skulle få oppleva akkurat denne filmen, møta regissøren og til og med mingla litt med han, er me likevel glade for at så mange møtte opp og valte å bruka denne kvelden på å sjå film og møta regissøren. Film eller ikkje, me i Naturvernforbundet Vindafjord / Etne håpar likevel at våre folkevalde tek ansvar for det demokratiske oppdraget dei har fått. Å vera folkevald handlar ikkje berre om å ta avgjerder, men om å lytta til innbyggarane og ta engasjementet deira på alvor. Me set vår lit til at dei folkevalde ser verdien av urørt natur og bidreg til at me kan vera stolte over å bu i ein kommune som er oppteken av akkurat dette.