Må vi invadere dei urørte fjella våre ?

Det er viktig å få presisert at det ikkje er slik at me i Etne ikkje skjønar behovet for meir kraft i regionen vår. Me i Etne heiar like mykje på Haugaland Næringspark som alle andre ( eigar eller ikkje ). Norge sin største regulerte næringspark, og det den har fått til, er ikkje anna enn imponerande. Me er også like stolte som alle andre over regionen vår og den kompetansen me har her.
Me i Etne ønskjer like mykje som andre kommunar å jobbe for at eksisterande industri og ny industri skal få den krafta dei treng.

Teknologien går framover

Me ønskjer like mykje som alle andre nyetableringar velkomne, og har kunnskap om kor viktig det er å etablere arbeidsplasser på Haugalandet.
Me ønskjer også å leggje til rette for rein energi og heiar på heile Haugalandet som grønn region.
Men, det må vere lov å ha to tankar i hovudet på ein gong. Er det verkeleg slik at me må invadere dei urørte fjella våre med desse store mastene for å få auka kraft til regionen vår?