Korleis står det til med lokaldemokratiet i Vindafjord?

Det er for tida mykje uro for antidemokratisk utvikling rundt om i verda. Men kanskje burde det lyse varsellampar for folkestyret i vår eigen kommune òg. I Vindafjord har me siste året fleire saker som bør få oss til å stille spørsmålet i overskrifta her.

På Dommersnes i Vikebygd er det frå innbyggjarane kravd ny regulering for oppstart av ny industri – mykje med tanke på at det er førespegla store inngrep i framtidige utvidingar av prosjektet. Kommunedirektøren held på at første del kan godkjennast administrativt. Men me ser allereie no at har me sagt A må me seie B». Kommunen har allereie måtta gå inn med 5 millionar i ekstra kapital – dagen før Fredrik Solvang i Debatten på NRK stiller opp fleire ekspertar som meiner at havvind neppe blir lønsamt. Innbyggjarane ville kanskje meine at pengane ville tent kommunen betre som vedlikehald av skular eller oppgradering av symjehall. Situasjonen er no at kommunen som deleigar i eit kommersielt selskap er i konflikt med eigne innbyggjarar – i staden for å sikre demokratiske prosessar, informasjon og dialog. Har våre folkevalde styringa her?

Kommunestyret, som har fått tillit gjennom lokalval, er kommunen sitt øvste organ mellom vala. Kommunestyret gjer styringsvedtak gjennom kommuneplan og planar for viktige samfunnsoppgåver – som t.d. skulebruksplan. Gjeldande skulebruksplan blei vedteken etter ein demokratisk prosess i kommunestyret, involvering av grendene og høyringar. Fleirtalet vedtok då noverande plan. Likevel opplevde me i sommar at det blei gjort vedtak i kommunen om flytting av mellomsteget på Bjoa til Vågen skule. Det er veldig uklart kor dette avviket frå skulebruksplanen er forankra demokratisk. Det blei vist til manglande kvalifiserte søkjarar til vikariat, sjølv om det arbeider ufaglærte i skular i kommunen. Vedtaket blei gjort administrativt utan å involvere/informere foreldre og tilsette på Bjoa.

Det er vanskeleg for innbyggjarane å få innblikk i prosessen, men sidan det var ei mellombels ordning, kunne det gjerast med eit administrativt vedtak. Men igjen har me sagt A må me seie B» (eller kan me tillate oss å ikkje seie B). I framlegg til budsjett for 2025 føreslår kommunedirektøren å leggje ned Bjoa skule – og Imsland skule/barnehage. Klart i strid med kommunestyret sitt vedtak i skulebruksplanen og etter kommuneplanen sine føringar om utvikling i alle våre 9 grender. Kommunedirektøren sine forslag til skulebruksplan blei forkasta etter grundig politisk handsaming i kommunestyret. Det må forventast at kommunedirektøren har meir respekt for vedtak i kommunestyret enn å prøve omkamp» i eit framlegg til årsbudsjett. Innbyggjarane som har gitt tillit gjennom val til kommunestyret, må ha tillit til at fleirtalet i vedtaket om skulebruksplan står for vedtaket, og at mindretalet òg syner respekt for eit fleirtalsvedtak i vårt høgste styringsorgan.

Sidan framlegg om nedlegging av skular/barnehage er gjort med tungt hjarte» av økonomiske grunnar, må me rekne med at framlegget blir trekt no når det blir auka overføringar frå staten.

Likevel er det nødvendig at kommunestyret tar ein gjennomgang av stoda for lokaldemokratiet vårt. Det som står på spel, er samhald i kommunen, tillit til politikarar og kommuneadministrasjon.

Demokratiet blir som regel styrkt av angrep utanfrå, medan den største trusselen er langsam forvitring innanfrå.

Tormod Sandsgård
På vegner av styret i Vindafjordlista

—

Les meir lokal debatt her: Debatt