Alle vil Skakke vel

Likevel går Skakke-saka igjen nye rundar i ringen. Snart kan alle i Etne forskjell på SA og AS.

Neste slag skal visst vere i idrettslaget.

Kommunen (frivillige politikarar som ønsker det beste for bygda) har vedtatt å kjøpe ut idrettshallen. Dei har rekna på det og fått juridiske vurderingar. Alt skal vere i orden.

Sparebankstiftinga, som sit på mykje pengar til ideelle formål i Etne- bygda, har og rekna på det. Dei har og fått juridiske vurderingar. Dei er ikkje einige med kommunen og meiner både reknestykket og vurderingar er feil.

Så då verkar det som om det er opp til Etne IL og vurdere kva som er rett? Best? Noko som er umogleg når verken økonomar eller juristar klarer å samle seg rundt gjeldande lovverk: korleis kan 30 millionar kroner gagne Skakke best?

Dei aller fleste aktørane i denne saka er frivillige og engasjerte bygdafolk. Dei ønsker det beste for vidare drift av både Skakke og alle frivillige lag som bur» her. I små bygder er mykje av aktiviteten tufta på frivilligheit og dugnad. I dag er det vanskeleg å rekruttere til dette. Idrettslaget står utan framtidig leiar, turngruppa manglar leiar. Etnemarknaden syns stadig det er vanskelegare å dekke inn dugnadsvakter. Skakke–saka skremmer vekk alle framtidige. Kven vil gå inn i konflikta som dette viser seg å vere?

Ingen ønsker splitting og konflikt, les eg i avisene. Då må aktørane samle seg, snakke i lag (ikkje via avisinnlegg, teieplikt og usvart kommunepost) og komme fram til gode løysingar for Skakke. Grunnlinja her er at me i Etne er kjempeheldige med fleire stiftelsar som deler ut store summar kvart år. Det må me klare å nytte positivt.

Idun Øvernes