Nye banar er klare til bruk
— Me får eit skikkeleg anlegg og håpar fleire vil spele. Dess fleire, jo betre, seier leiar Harald Ekornrud i tennisgruppa i Etne IL.
Anlegget på 37 x 37 meter har kunstgras, drenering og tre meter høgt gjerde. Her er det to tennisbanar som blir opne for spel så lenge det ikkje er snø eller frost.
Annonse
Inviterer til kurs
I slutten av august var det testspeling på banane. Tennisgruppa ventar førebels på at booking- og låsesystemet med appen Matchi skal kome opp og gå før dei er skikkeleg i gang. Men allereie no kan dei som ønskjer å spele ta kontakt med Ekornrud eller Annelise Skrunes og få ein kode til nøkkelen dei treng for å kome seg inn på banane.
Det blir gratis for medlemmene i Etne IL å bruke banane, også utanom organiserte treningar. For andre som ønskjer å spele, blir det lagt opp til ei mindre avgift.
— Her vil det vere opent for alle nesten heile tida, fortel Ekornrud.
Annonse
Tennisgruppa planlegg eit nybegynnarkurs helga 4. og 5. oktober, der påmelding skal gå gjennom appen som blir knytt til bookingsystemet. Framover håpar gruppa også å få på plass ein trenar. Dei vil ha påmelding til kurs gjennom appen Matchi.
For alle
Med dei nye banane har Ekornrud forhåpningar om at tennisgruppa skal vekse. Han peikar på at dei har fått eit mykje betre anlegg enn det dei hadde på dei gamle banane. Det skal vere ei offisiell opning av dei nye banane. Tennisgruppa vil sjå an vêret for tidspunkt.
— Det blir ei av dei komande helgene, kanskje i samband med kurset, fortel tennisleiaren.
Dei nye tennisbanane ligg i hjartet av idrettsområdet i Etne sentrum. Like ved er både skatebane og pumptrack-bane, medan kunstgrasbanen ligg på andre sida av vegen. I tillegg er det kort veg til Skakke, Skakkringen og Etne stadion.
Tidlegare i år kjøpte Etne IL også den såkalla Oldentomta» ved Old River Saloon for framtidig utvikling, medan kommunen har bede om innspel til kva som kan kome på arealet der dei gamle tennisbanane ligg.
Annonse
— Dei nye banane blir eit flott tillegg til aktivitetstilbodet i bygda. Tennis kan spelast av folk i alle aldrar, og banane blir tilgjengelege for alle som bur i og besøker Etne, seier Ekornrud.
Stor dugnad
Heile prosjektet har ein prislapp på rundt tre millionar kroner og er fullfinansiert. Her har både dugnadsarbeid og lokale bidrag vore avgjerande. Firmaet Procon ved Kjell Ekornrud stod for prosjekteringsarbeidet på dugnad, medan seniorgjengen i Etne IL gjorde mykje av sjølve bygginga.
Etne kommune har forskottert tippemidlar og gitt ei pengegåve, og saman med sponsormidlar frå Sparebanken Norge, Elagsfondet og Sunnhordland Kraftlag (SKL) har prosjektet kome i mål. Tennisgruppa har nytta mange lokale bedrifter i prosjektet som og har sponsa.
— Me har vore heldige og fått mange gode sponsorar, avsluttar Ekornrud.
