Fekk seks timar ekstra arbeidsveg

Å koma seg frå Rullestad til Etne baud på utfordringar då E134 blei rasstengd i Fjæra sundag 1. mars. Alternativa var å køyra via Husnes eller Ropeid, noko som betyr ein omveg på om lag tre timar kvar veg. For Edit Løyning, som til dagleg jobbar som tannpleiar ved Etne Tannklinikk, var dette ei løysing ho ikkje var tent med. Alternativet blei å søkja losji hos ei venninne i Etne.

— Vegen gjennom Brattlandsdalen blei stengt sundag så eg kom meg ikkje på jobb på måndag morgon. Det tapte eg ein arbeidsdag på og eg måtte dekka tapet sjølv. Frå måndag til fredag budde eg hos ei venninne, seier Edit og er takksam for at ho fekk ordna seg privat overnatting.

— Eg hadde det fint, men ikkje alle klarar å organisera privat overnatting, og hotell er dyrt, seier ho.