Den store delegasjonen frå Etne IL kunne reisa tilfredse heim etter årets Regy Cup, som er i regi av Haugar og er retta mot aldersbestemte lag i 2. og 3. divisjon. Både jentelaget (J16) og gutelaget (G15) kom seg like til finalen der det blei sigrar og full jubel.
— J16 laget er eit ganske nykomponert lag, beståande av 14-, 15- og 16-åringar, og har mykje ferdigheiter, både defensivt og offensivt. Målet for cupen var å styrka moralen i laget endå meir og å vinna cupen, seier Daniel Gullachsen, ein av leiarane.
Det starta med 2-1-siger både mot Loddefjord og Hundvåg, før dei sendte Stegaberg til B-sluttspel med 6-0 i sekken. Med gruppesiger bar det rett til kvartfinalen der vertsklubben venta. Haugar greidde å utlikna på straffe og med resultatet 1-1 blei det straffesparkkonkurranse som Etne-jentene vann 5-4.
