Fotballhall har fått namn

— Me ser fram til eit godt samarbeid med ein svært dyktig og lokal entreprenør, skriv Ølen IL i eit Facebook-innlegg.

Fotballhallen som skal byggjast, er ein 9ar-hall og skal koma rett ved dagens 11ar-bane.

Ti år

Namnet på den nye storstova blir Omega-hallen. Gjennom ein tiårig avtale med Omega Property AS og MittDistrikt Invest har Ølen IL sikra seg det dei omtalar som gode årlege inntekter og eit særs viktig bidrag til finansieringa av hallen.

Frå før har klubben sponsornamn på sine to banar: 7ar-banen heiter Westcon-banen, medan 11ar-banen heiter SpareBank 1 Sør-Norge Stadion Ølen.

No ventar Ølen IL berre på den endelege godkjenninga frå kommunen – deretter går dei i gang med grunnarbeida. Klubben skriv at i tillegg til klargjering for sjølve hallen får dei på plass betre tilkomst, fleire parkeringsplassar og tryggare forhold for dei som skal sleppa av spelarar til trening.

— Me satsar på at siste rest av finansieringa kjem på plass ganske snart, slik at me kan starta bygginga av sjølve hallen neste år, skriv Ølen IL.

Ei omlegging av innkøyringa til idrettsområdet er behandla politisk og stadfesta av Statsforvaltaren.

Vil forlengja samarbeidsavtale

Medlemmene i Ølen IL vil få eit innblikk i status og planar vidare for hallen på eit ekstraordinært årsmøte tysdag 21. oktober. Der skal det stemmast over ein ny samarbeidsavtale som fotballstyra i Ølen IL og Etne IL har blitt einige om – for jenter frå 13 år og opp til seniornivå.

Denne avtalen treng godkjenning frå årsmøtet i Ølen IL, og hovudstyret innstiller på at ein skal vedta denne. Det står i avtalen at det overordna målet er å gi både gutar og jenter eit godt og likeverdig tilbod, slik at flest mogleg speler fotball lengst mogleg.

Avtalen går over tre år – frå og med 1. februar 2026 til og med 31. januar 2029. Målet er at totalt 40 prosent av både jenter og gutar i alderen 12–17 år er aktive. I 2022-sesongen var det om lag 33 prosent aktive i denne aldersgruppa i Vindafjord kommune, men med stor skeivfordeling: om lag 20 prosent av jentene og 42 prosent av gutane var aktive.

Etne og Ølen IL har allereie hatt ei samarbeid om jentefotballen i fleire år, og har i 2024 tre felles lag i seriespel.