Byr på toppstandard

— Det har vore snakk om å kanskje søkje om å ha eitt av stemmene før Landsskyttarstemnet på Voss neste år, fortel Reidar Rødne.

Dei er rimeleg sikre på at anlegget mellom Ølen og Etne nå held den nødvendige standarden til Det frivillige Skyttervesen for å arrangere det prestisjefylte stemnet.

Korta ned avstanden

Den nye banen ligg på same stad som skyteanlegget sin gamle 300 metersbane som blei bygd i 1978 låg. Lien forklarar at 300 meter var standard den gongen, mens alle banar som blir bygd i dag har 200 meter til blinkane.

— Me ville følgje med i tida og har fått ei oppgradering til eit tipp topp anlegg som held ein moderne standard, seier Lien.

300 metersbanen blei til slutt ganske slite, og då Hordastevnet blei halde der i 2018 var arrangøren klare på at det var siste gong den skulle har eit større meisterskap slik anlegget stod. Same år begynte planlegginga av 200 metersbanen.

Den nye banen er flytta lågare i terrenget slik at den blir mindre utsett for vind. Det er oppgradert software på banen som gjer at folk nå kan følgje skot for skot på nett. Folk kan også ta jegerprøvar på banen.

— Veldig mange jegerar er avhengig av skytebanen, samt at politiet leiger hos oss og trenar her. Dette er noko av den samfunnsnytta me tilbyr, seier Rødne.

Lagt til rette for meir

Trioen tek Grannar med på køyretur ut til skivene på vegen entreprenør Berge i Berge Maskin og Entreprenør AS har oppgradert. Firmaet hans starta på bygginga i oktober 2021 og halde på gjennom vinteren.

— Det var ein kjekk jobb. Me var heldige som fann fjell som var nærme der me kunne sprenge ut masse til å bygge ut, fortel Berge, som er medlem av Ølen skyttarlag.

Arbeidet starta med utskifting av gamle røyr i bekkar. I tillegg til å ha gjort omfattande og grundig arbeid som skytarane kan glede seg over i dag, har entreprenøren også tilrettelagt for at det potensielt kan bli utbygd enda meir på sikt.

Mange å takke

Ved skivene kan ein kikke vidare mot dei attverande blinkane til den gamle 300 metersbanen og merke seg klasseforskjellen. Skivene har store og tydelege skilt som gjer det nærmaste umogleg å sjå feil mellom dei på 200 meters avstand. Treverk og betong av topp standard held skivene på plass, mens store mengder sand sørgjer for at kulene ikkje skapar problem.

— Det er blitt gjort mykje dugnad, blant anna betongarbeid, for å gjere banen til eit av dei beste anlegga på Haugalandet, fortel Rødne.

Kostnadsoverslaget på prosjektet er 3,2 millionar kroner. Av desse håpar dei å få inn inntil éin million i tippemidlar. Rødne takkar kulturkonsulent i Etne kommune, Liv Kari Bødtker, for hjelp til å lage søknad til desse midlane.

Dei har også fått bidrag gjennom andre støtteordningar; 100.000 kjem frå Sparebanken Vest gjennom ei støtteordning etter tips frå Etne Sparebank, dei har 100.000 til prosjektering av anlegget frå E-Lagsfondet, samt 20.000 frå SØK. Fleire bedrifter har også bidrege.

— Åsbø Sanddrift har gitt mange hundre tonn gratis sand til kule- og skivevoll, Vest Stål og Fasade spanderte brakettar og sikkerheitsmerke, Berge Sag gav alt av treverk, Etne Betong lånte oss gratis forskaling og gav fordelaktige prisar, og Westcon gav skilt (også på 100 metersbanen) og har lova ein container me kan lagre skiver og anna materiale i når det ikkje er i bruk, fortel Rødne.

Håpar på vekst

Etne skyttarlag har cirka 160 medlemer, mens skyttarlaget i Ølen har cirka 180. Til saman har dei 15-20 aktive skytarar som reiser på stemne. Lien fortel at var ein liten nedtur under pandemien med stengt anlegg, og at dei ikkje har komme skikkeleg i gang med skyting etter det.

— Me satsar på å skyteskule for dei unge til hausten, seier han.

Trioen har tru på at dei gode lokale resultata på Landsskyttarstemnet, der sporten er ein av få der kjønna konkurrer i same klassar og folk i alle generasjonar konkurrer på same stemne, får vist seg fram på NRK i beste sendetid, kan ha ein positiv effekt. Framover blir det førebuing av innskyting og tiltak retta mot ungdommar.

— Eg trur banen kan hjelpe til at fleire får interesse for skyting, seier Rødne.

På søndag blikr det arrangert den første konkurransen på den nye banen, nemleg Samlagstemnet for skyttarar frå heile Sunnhordland.