Vil få ut potensialet til dei eldre

Dette kom fram då eit felles forslag til budsjett for 2026 og økonomiplan for 2026–2029 blei presentert i eit formannskapsmøte tysdag. Alle dei sju partia i kommunestyret er med på forslaget.

Tilrettelegging og eige ansvar

I tillegg til budsjettpostane i framlegget er det nokre forslag til verbalvedtak, som er tekstlege forslag som kan bli vedtekne. Eit av desse har tittelen Mobilisere eldrekrafta». Det lyder:

Kommunestyret ber om at det blir sett i gang eit arbeid for å mobilisere eldrekrafta i Vindafjord. Kommunen skal, i samarbeid med rådet for eldre og personar med funksjonsnedsetting, relevante lag og foreiningar, utarbeide ein eigen plan for å identifisere, motivere og nytte den aukande eldreressursen i Vindafjord.

Denne planen skal leggje til rette for at eldre kan stå lenger i arbeid og bidra aktivt i lokalsamfunnet gjennom frivillig arbeid, ta ansvar for eiga helse og bumiljø, kompetansedeling og deltaking i kulturelle og sosiale aktivitetar. Målet er å styrkje fellesskapet, auke livskvaliteten og bidra til berekraftige tenester i kommunen.

Planen skal inngå i helse- og omsorgsplanen, men skal også vere breitt forankra i andre sektorar og ikkje avgrensast til helse- og omsorgstenester. Planen blir innarbeidd i første rullering av helse- og omsorgsplanen.

Arbeidet skal leggje vekt på samarbeid med frivillige organisasjonar, næringslivet og lokalsamfunnet for å sikre heilskaplege og varierte tilbod.

Kommunedirektøren får i oppdrag å starte prosessen med planen innan 2026. Utval for oppvekst og omsorg (OPOM) blir orientert fortløpande.»

10. november blei ein 38 sider lang helse- og omsorgsplan for 2026–2030 sendt ut på høyring. Planen tek for seg rammer og føringar, situasjonsbeskriving, strategiske innsatsområde og ein handlingsplan. Høyringsfristen er 31. desember.

Jobbar vidare med sjukeheim

I sitt forslag til budsjett og økonomiplan foreslo kommunedirektør Yngve Folven Bergesen å byggje eit heilt nytt omsorgssenter eller gjennomføre ombyggingar av ein storleik som gjer at ein kan gå frå dagens to omsorgssenter til eitt. Slik vil ein møte utfordringar knytte til både drift og kapasitet.

Kostnadsanslaget for investeringa er mellom 800 og 900 millionar kroner i bruttokostnad. Kommunen må sjølv finansiere rundt 500 millionar av dette. Prosessen blei starta i formannskapet 5. november og skal halde fram i kommunestyret 16. desember.

Kommunestyret justerer Folven Bergesen sitt forslag ved å vise til eigne vedtak. Dei slår fast at formannskapet skal vere styringsgruppa for arbeidet, og at det difor er behov for jamlege oppdateringar – minimum i annakvart møte. OPOM skal få tilsvarande orienteringar.