Varaordførar Andreas Grumheden (t.v.) og ordførar Mette Heidi Bergsvåg Ekrheim i strålande humør utanfor kyrkja på Stødle med det aktuelle området bak seg.
Nils Tokheim
Vann sak etter mange år
Det er glede i Etne over at kommunen har fått omgjort ei 25 år gamal fredingssak kor Riksantikvaren var tungt involvert.
Det er Stødleterrassen som no er tilbake for Etne kommune å forvalta. Anna lovverk som til dømes kulturminnelova må ein ta omsyn til, men det er plan- og bygningslova som vil vera det politikarane og administrasjonen først har å forhalda seg til på området som er på 521 dekar.
— Lokaldemokratiet har med dette fått ein ny siger, for nå er klagen frå eit einstemmig kommunestyre tatt til følge. Det er ein god julepresang at me har fått gehør for at ein med lokale planar og overordna lovverk klarar å ta vare på det kulturminnerike området på Stødle, seier ordførar Mette Heidi Bergsvåg Ekrheim (Sp).
Ho seier at det er blitt arbeida mot dette i Etne heilt sidan Hordaland fylkeskommune fatta vedtak om mellombels freding den 29. september 2000.
