Unngå tette avløpsrøyr i jula

— Matfett skal ikkje i avløpet. Det skal i restavfallet, seier røyrleggjar Knut Inge Haraldseid i Rørlegger Haraldseid AS i Skjold.

Matfett som blir tømt i vasken eller i toalettet skapar store problem. Stivna fett som legg seg på innsida av røyra kan føra til tette røyr når det når det kjem ut i avløpsnettet. Og endar fettet i kommunale avløpssystem kan det auka risikoen for rotteplager.

Det beste ein kan gjera for å unngå fett i avløp er å tømma restar frå juleribba, pinnekjøtet eller andre fettrike matrettar i tette behaldarar som seinare blir kasta i restavfallsdunken. Ein tom mjølkekartong eller ei tom flaske kan nyttast som behaldar. Har du store mengder fett eller matolje skal dette leverast til ein gjenvinningsstasjon.