Tvungen framtidsinvestering
Vindafjord kommune satsar no femti millionar kroner på å sikra vassforsyninga for området frå Solheim i Skjold til Knapphus i Øvre Vats. Prosjektleiar for kommunen, Willy Skulerud, seier at oppstart er i august og at prosjektet går over femten månader.
Dermed blir òg brannførebuinga betre i området. Kommune har ansvaret for vassforsyninga til folk og næringsliv, men ikkje i Ølen, Ølensvåg og Bjoa som har private vassverk.
Det er einingsleiar for kommunaltekniske tenester, Berit Fyljesvoll Haugsland, som er den øverste ansvarlege for gjennomføringa, og det er Willy Skulerud som er den som har prosjektansvaret frå dag til dag.
— Det er krav frå styresmaktene som gjer at me må ta tak i dette. Tidlegare var det krav om nødvatn, men nå heiter kravet reservevatn og er langt meir omfattande, seier Skulerud.
