Vindafjord Turlag blei stifta i november i fjor, og vende seg snart til Haugesund Turistforening for eit generelt samarbeid. Først oppe på agendaen for dei to partane, som nå deler medlemsregister, er så mykje som sju godt tilrettelagde turvegar i distriktet. Desse skal vere gruslagde og lett framkommelege, enten ein syklar, rir eller går og spring med lette sko.
Omfattande
I fleire tilfelle er stykke av vegane allereie der, og det er arbeid med deler som trengst for å knyte det heile til ein samanhengande turveg av gjennomgåande god standard. Utbetringa av den gamle postvegen mellom Etne og Ølen, det første prosjektet som nå er vel undervegs, er eit eksempel på dette. Trass fordelaktige utgangspunkt kostar dette sjølvsagt store pengar. Postveg-prosjektet blir stipulert til 2.575.000 kroner og dei sju prosjekta samla vel 23 millionar.
