Tone Damli fjernar Tesla-referanse i MGP-låt
Rett før MGP-finalen laurdag har Tone Damli endra teksten i låten sin. Ho song opphavleg om å køyre rundt i ein Tesla.
– Eg har hatt ei uggen kjensle rundt det å synge Tesla dei siste vekene, forklarer artisten i ein sms til VG.
I den opphavlege versjonen av låten song Damli om å roll up in a Tesla», ifølgje avisa. No skal bilmerket fjernast.
Annonse
– Det toppa seg den siste veka med alt ein har sett, høyrt og lese, og eg vil ikkje vere ein som frontar Tesla og Musk, skriv Damli.
Fredag var Damli i studio for å spele inn ny vokal på låten, men til så lenge ligg originalen ute på Spotify. Laurdag kveld står ho på scena i MGP-finalen i Oslo Spektrum og framfører låten.
Manageren til artisten, David Eriksen, vil førebels ikkje seie kva Tesla blir bytt ut med i låta.
Tesla-eigar Elon Musk har vorte ein stadig meir kontroversiell figur dei siste månadene.
Annonse
Han har både flørta med ytre høgre-parti i Europa og gjorde ei omdiskutert armrørsle på ein talarstol i samband med innsetjinga av president Donald Trump i USA i januar.
Musk samarbeider tett med den amerikanske presidenten og har fått i oppdrag å leie effektiviseringsbyrået Doge, som står i spissen for store kutt og omveltingar i offentleg sektor i USA.
Ei undersøking blant 500 norske Tesla-eigarar denne veka, viste at 44 prosent meiner Musk påverkar Tesla svært negativt», medan 40 prosent meiner han påverkar selskapet negativt».
(NPK)
