Inga Rullestad Øyan og broren Ole Rullestad har flytta heim igjen til Rullestad der dei vaks opp.
Irene Mæland Haraldsen
Tilbake i sitt heimlege paradis
Den vesle grenda Rullestad i Etne kommune
har dei siste åra vore prega av fråflytting og låge innbyggjartal. Men så
skjedde det noko. Ole Rullestad og søstera Inga Rullestad Øyan flytta heim
igjen og dermed kunne åtte nye namn førast til innbyggjarlista som før auken
talde 12 personar.
— Eg har alltid hatt lyst til å
bu på Rullestad. Eg har alltid vore bestemt på å koma heim igjen og eg var
heldig at Maren ville flytta tilbake, seier Ole Rullestad (29) og er svært nøgd
med den nye kvardagen på Heimigarden på Rullestad der han vaks opp.
Eit travelt byliv i Bergen og Stavanger blei
historie i sommar, og saman med kona Maren og ungane Sigrid (2) og Astrid (7
veker) har han funne seg godt til rette i gamlehuset på garden. På sikt er
planen å flytta til hovudhuset der foreldra bur i dag og fortsetja gardsdrifta med
sau og geit.
