Strengare tryggingskrav for smartklokker og robotstøvsugarar frå august

– Dei nye cybertryggleikskrava er mellom anna knytt til nye krav om autentisering, oppdatert programvare og brukardokumentasjon, for å nemne noko, seier direktør Espen Slette for spektrumsavdelinga i Nasjonal kommunikasjonsmyndigheit (Nkom).

Døme på produkt som blir omfatta av dei nye krava, er smartklokker, robotstøvsugarar, babycall, smarthussystem, røykvarslarar, men også automatiske bomsystem, ladesystem for elbil, radarar og anna utstyr som kan kommunisere anten over internett eller trådlaust.

Nkom har ansvaret med å føre tilsyn med elektronisk utstyr i Noreg. Dei nye krava gjeld utstyr som blir produsert frå 1. august. Men varer som er lagerført før denne datoen, kan framleis seljast i butikkane.