Energi
Stort kraftengasjement
— Me må begynne å tenkje framover. Sjøkabel er eit godt alternativ som me må ta oss råd til i dette landet, sa Harald Selsaas.
Folkemøtet tysdag blei arrangert av Statnett og Noregs vassdrags- og energidirektorat (NVE). Dei fleste setene i Ølen kulturhus var fulle av folk frå ulike bygder i Grannar-distriktet.
Annonse
Erstattar det gamle
Statnett har sendt melding til NVE om at dei vil byggja to nye 420 kV-kraftleidningar mellom Sauda og Gismarvik. På vegen kjem dei også innom Etne og Vindafjord.
Desse leidningane skal erstatta dagens 300 kV-leidningar, som er gamle og har for låg kapasitet. Det eksisterande nettet blei bygd av Hydro på 1960-talet.
På møtet orienterte NVE om saksgangen, medan Statnett informerte om prosjektet. Ingrid Maria Bik og Tanja Midtsian var NVE sine representantar, medan traseplanleggar Lars Arne Bakken og prosjektleiar Kjetil Helland var på scenen for Statnett og viste fram kart over moglege traseval og eksisterande linje. Alle var tydelege på at dei ønskjer flest mogleg høyringsinnspel før fristen 4. april.
Annonse
Saknar heilskap
Etter presentasjonane blei det opna for spørsmål frå salen. Engasjementet var så stort at spørsmålsrunden blei dobbelt så lang som presentasjonsdelen. Mange lurte på om leidningane skal brukast til elektrifisering av sokkelen og vindkraftprosjekt, og om det verkeleg er behov for både dette prosjektet og Blåfalli-Gismarvik samtidig.
— Det er eit stort behov for straum på Gismarvik, så vel som på Kårstø, forklarte Helland.
Når det gjeld vindkraft og elektrifisering av sokkelen, sa han at ingen prosjekt innanfor dei kategoriane har vore utløysande for fornyinga av Sauda-Gismarvik-linjene. Torstein Halsos Stuhaug saknar ein heilskap i korleis ein ser på alle tiltaka som fører til inngrep i naturen.
— Hadde alle linjene som ein vil byggja, blitt sende inn i ein felles søknad, kunne NVE ha behandla det annleis enn når det blir søkt om ei og ei linje, sa Halsos Stuhaug.
Tanja Midtsian i NVE synest det var eit godt poeng og understreka at sjølv om dei behandlar søknad for søknad, prøver dei å sjå det store biletet.
Annonse
Politiske føringar
Fleire i salen uttrykte bekymring over konsekvensane dei planlagde linjene kan få for naturen. Statnett og NVE fekk innspel om viktigheita av synlegheit i ulike turområde og i landskapet. Kjell Bakke, som bur i Nedre Vats med utsikt til Døldarheia, var blant dei mest kritiske.
— Traseane kjem til å rasera nesten alt rundt oss, sa Bakke.
Han lurte på kvifor dei ikkje kan følgja den eksisterande traseen. Helland svarte at dette er vanskeleg fordi den ligg nær bustadhus. Dagens 300 kV-leidningar krev eit byggeforbodsbelt på cirka 67 meter, medan dei nye 420 kV-leidningane vil krevja omlag 80–85 meter.
Torgeir Øverland var blant dei som ønskte sjøkabel i staden for luftleidningar for å avgrensa naturinngrepa.
— Me må ikkje berre tenkja på pengar, men òg på naturen sin verdi, sa han.
Annonse
Midtsian svarte at Statnett må vsei noko om kabelalternativ, slik dei gjer i andre prosjekt. Likevel peika både NVE og Statnett på at Stortinget sine retningslinjer prioriterer luftspenn når straumnettet blir bygd ut.
Blir ikkje rike
Ein del av dei frammøtte er grunneigarar i dei aktuelle områda. Då han blei spurt om kva kompensasjon ein kan vente seg for å få master på sin eigedom, ville ikkje Helland vere for konkret på summar, men han fortalde at det er snakk om ein eingongssum.
— Ingen blir rike av dette, sa prosjektleiaren.
Martin Aeschlimann fortalde at han har fått tilbod om 2.000 kroner for eit mastefeste på sin eigedom. Han sa at han hadde fått eit brev frå Statnett der han kunne velja mellom å skriva under eller gå gjennom ein rettssak. Dette synest han er ein lite hyggeleg måte å tilnærma seg grunneigarar på.
Gjennom heile møtet var NVE og Statnett tydelege på at dei ønskjer innspel frå folk som kjenner lokale forhold. Andreas Andreassen har den einaste industritomta i Vikedal. Han påpeikte at det eine trasevalet går gjennom denne. Traseplanleggar Lars Arne Bakken svara at dei prøver å unngå å gå gjennom industriområde, og oppmoda Andreassen til å senda høyringsinnspel om dette.
Annonse
Einride Aakra meinte stemninga på møtet var i overkant negativ og fortalde at han i større grad har møtt folk på tur i område med kraftutbyggingar enn der det er urørt natur.
