Stor begeistring over ny butikk
Folk strøymde til den nye Spira-butikken midt i Etne sentrum då dørene opna torsdag ettermiddag. Handelen gjekk livlig og lovorda sat laust blant kundane som tydeleg viste at dei sette pris på det nye tilbodet.
— Dette har eg gleda med til lenge. Eg har kikka inn vindauget i ei veke nå, seier Hanne Klokkerstuen og helsar den nye butikken hjarteleg velkomen.
— Det er kjekt at Spira får visa kva dei kan tilby. Dei er veldig flinke og så er det god trening for dei som jobbar her, seier ho.
Annonse
Hanne og ektemannen Morten var dagens første kundar og i nokre få sekund etter at butikkdørene opna klokka tre torsdag ettermiddag hadde dei lokalet for seg sjølv og kunne ta ein kikk i fred og ro. Men det varte ikkje lenge før dei fekk selskap av andre handlelystne etnebuar, og snart var lokalet fylt med nysgjerrige damer og menn på jakt etter ei julegåve eller to.
Gåvebutikk
I dei julepynta butikkhyllene bugna det av gåveartiklar. Det meste laga og pakka av dei tilsette på Spira. Dei flotte handlaga lysa frå Litledalen lys var sjølvsagt på plass, enten pakka i gåveesker eller som del av ei gåvepakke saman med andre små interiørvarer. På disken har eit stativ med kort produsert av Etne Mållag og med tekstar av Ingvar Moe og dekor av Jan Terje Rafdal fått plass og i det eit par julepynta bjørkekvister heng fargerike koppar klar for nye eigarar. Koppane er ein del av bruktbutikk-avdeling som har fått plass i den eine enden av butikklokalet. Her kan kundane handla både bord og stolar, og skulle ein ha bruk for litt lesestoff til jul eller eit nytt kaffiservise er det meste å finna i brukthjørna.
Annonse
— Alle kan koma inn med varer til bruktbutikken. Me har alt fått mykje varer og dette er berre litt av det me har fått inn, seier butikkleiar Hege Garvik Arefjord.
Kafékrok
Når handelen er unnagjort er kundane velkomne til å slappa av i sofakroken eller ved eit av kaféborda inne i butikklokalet, og når våren kjem og vêret igjen byr på varme dagar er planen å utvida kafeen med småbord ute. Men enten ein vel å slappa av i godstolen innandørs eller ønskjer å kosa seg ute i det fri står butikkpersonalet alltid klar med både te, kakao, kaffi og noko godt i bita i.
— I kafeen blir det servert drikkevarer kvar dag me har ope, og så har me planar om å steika vafler og selja litt enkel bakst frå bakeriet, seier butikkleiar Hege som saman med Anne Grete Johanson og Maria Ørke har ansvar for butikken denne opningsdagen.
— Me kjem til å vera to eller tre personar i butikken kvar dag. I starten vil butikken ha ope tysdag, torsdag, fredag og enkelte laurdagar, seier ho.
Mykje arbeid
Annonse
Staben bak Spira-butikken har lagt ned mykje arbeid den siste tida for å få alt klart til opningsdagen. Veggene har fått seg eit strøk maling. Handledisken og sitjebenken ved vindauget har tilsette ved bedrifta snikra på eigen verkstad og den gamle benken ved inngangsdøra er blitt friska opp med knallgul maling. Dei gamle stolane frå Rygg bedehus har fått plass ved inngangsdøra og eit gamalt grønmåla kjøkkenbord har fått nytt liv som pakkedisk.
— Me ville ha alt klart til julegateopninga. Det har vore mykje jobb, men me har fått hjelp av mange, seier Hege.
Planar om utviding
Spirabutikken held til i lokalet der malarbutikken Grindheim & Sønn tidlegare rådde grunnen. Førebels har dei tatt i bruk om lag halvdelen av det gamle butikklokalet, men på sikt er planen å nytta heile arealet.
— Me har fått avtale med Skakke Røykeri som vil ha utsal her, og me har ambisjonar om å få til ein tekstilverkstad der me kan tilby mindre tenester og laga eigne produkt, seier butikkleiaren som også har planar for bruktbutikken.
— Me ønskjer å utvida bruktbutikken med redesign på sikt, seier ho.
